"Arpaçay Open" Beynəlxalq Karate Turniri Şəhidlərin Xatirəsinə Həsr Olundu və Uğurla Yekunlaşdı

Sərhədçi İdman Mərkəzində şəhidlərimizin əziz xatirəsinə həsr olunmuş 11-ci "Arpachay Open" beynəlxalq karate turniri uğurla yekunlaşıb.

İdman.Biz xəbər verir ki, Azərbaycan Respublikası Gənclər və İdman Nazirliyinin və Azərbaycan Karate Federasiyasının dəstəyi, Arpaçay İdman Birliyinin təşkilatçılığı ilə keçirilən turnir 30–31 yanvar tarixlərində beynəlxalq formatda, 1 fevralda isə uşaqlar arasında ölkədaxili yarışlar şəklində reallaşıb.

Turnirin açılış mərasimində şəhid ailələri və qazilər, Azərbaycan Karate Federasiyasının rəhbərliyi, ictimaiyyət nümayəndələri, eləcə də 12 ölkədən olan idmançı və rəsmi şəxslər iştirak ediblər.

Açılış mərasimində çıxış edən Azərbaycan Karate Federasiyasının prezidenti, Milli Məclisin deputatı Ülvi Quliyev turnirin şəhidlərin xatirəsinə ehtiram ifadəsi olduğunu bildirib, ölkədə idman siyasətinin inkişafını və karate idman növünün gücləndirilməsi istiqamətində görülən işləri vurğulayıb.

Milli Məclisin Gənclər və İdman Komitəsinin sədri Şahin İsmayılov isə bu cür beynəlxalq yarışların gənclərin idmana marağının artırılmasında, sağlam həyat tərzinin təşviqində və ölkənin beynəlxalq idman imicinin möhkəmləndirilməsində əhəmiyyətini qeyd edib.

Beynəlxalq turnirdə 12 ölkədən 1200-ə yaxın idmançı müxtəlif yaş və çəki dərəcələrində mübarizə aparıb. Yarışlar gərgin və maraqlı qarşılaşmalarla yadda qalıb. 1 fevralda keçirilən uşaqlar arasında ölkədaxili turnir isə gənc karateçilərin bacarıqlarının üzə çıxarılması baxımından xüsusi əhəmiyyət daşıyıb.

Bütün kateqoriyalar üzrə qaliblərə medal, diplom və hədiyyələr təqdim olunub.