Idman.biz
"Sabah" basketbol klubu yeni mövsüm öncəsi heyətini amerikalı mərkəz oyunçusu Kuinsi Ballardla gücləndirib.
İdman.Biz xəbər verir ki, Bakı təmsilçisi 213 sm boya malik basketbolçu ilə üç illik müqavilə imzalayıb.
ABŞ-ın Nyu-York ştatının Sirakuz şəhərində anadan olan Ballard basketbol karyerasına "Henninger High School"da başlayıb. Daha sonra Şimali Karolinada yerləşən "Quality Education Academy"də çıxış edən mərkəz oyunçusu son mövsümündə hər qarşılaşmaya orta hesabla 14 xal, 11 ribaund və altı blokla yadda qalıb.
Ballard 2020-ci ildə NCAA karyerasına "Florida State Seminoles" komandasında başlayıb. O, burada keçirdiyi iki mövsümdə 36 oyunda meydana çıxıb. İlk mövsümündə "Florida State" NCAA turnirində "Sweet 16" mərhələsinə qədər irəliləyib.
Amerikalı basketbolçu 2022-ci ildə "Wichita State Shockers"a keçib. Onun fərdi göstəricilərində əsas yüksəliş də məhz bu komandada qeydə alınıb. Ballard 2023/2024 mövsümündə orta hesabla 7,4 xal, altı ribaund və 2,2 blok toplayıb.
2024/2025 mövsümündə isə mərkəz oyunçusu NCAA karyerasının ən məhsuldar dövrlərindən birini keçirib. O, hər oyuna orta hesabla 10 xal, 9,2 ribaund və 1,9 blokla oynayıb, oyundan atışlarda isə 75,1 faiz dəqiqlik göstərib.
Ballard həmin mövsüm "American Athletic Conference"də blok göstəricisinə görə lider, ribaundlarda isə ikinci olub. Onun 75,1 faizlik atış dəqiqliyi "Wichita State" tarixində bir mövsüm üzrə ən yüksək göstərici kimi rekorda düşüb.
Kuinsi Ballard 2025/2026 mövsümünü "Mississippi State Bulldogs"un heyətində keçirib və NCAA-nın ən güclü konfranslarından biri hesab olunan SEC-də çıxış edib. O, mövsüm ərzində komandanın bütün 32 oyununda meydana çıxıb, 28 qarşılaşmaya start beşliyində başlayıb.
Amerikalı basketbolçu həmin mövsümü orta hesabla 6,5 xal, 6 ribaund və 1,1 blok göstəricisi ilə başa vurub.
