Idman.biz
"Neftçi" basketbol klubunun baş məşqçisi Konstantinos Vasiliadis komandasının FIBA Avropa Kubokunun qrup mərhələsinin dördüncü turunda Rumıniyanın "Oradea" klubuna məğlubiyyətini şərh edib.
İdman.Biz xəbər verir ki, mütəxəssis müsbət nəticə əldə etmək üçün basketbolçuların bütün görüş ərzində maksimum diqqəti qorumalı olduqlarını vurğulayıb.
"Basketbol basketboldur və hər kəs bu oyunun qaydalarını bilir. Mən oyunçularıma daim deyirəm ki, hər matça 100 faiz hazır olmaq lazımdır. Əgər 99 faiz hazırsansa, istədiyin nəticəni əldə edə bilməyəcəksən. Biz basketbolçulara bütün zəruri məlumatları veririk, videomateriallar göstəririk, rəqibləri ətraflı təhlil edirik və onlara kimə qarşı oynayacaqlarını izah edirik", - deyə Vasiliadis İdman.Biz-in sualını cavablandırarkən bildirib.
Baş məşqçinin sözlərinə görə, əsas problemlərdən biri komandanın bütün matç ərzində tələb olunan oyun səviyyəsini qoruya bilməməsidir.
"Basketbol 10-15 dəqiqə deyil, 40 dəqiqə davam edir. Oyunçu bütün bu müddət ərzində mübarizəyə tam hazır olmalıdır. Biz basketbolçulara həmçinin izah edirik ki, meydana çıxanda bir dəqiqəni belə itirmək olmaz. Buna görə də hazırlıq və fədakarlıq 100 faiz olmalıdır", - deyə mütəxəssis vurğulayıb.
Xatırladaq ki, "Neftçi" Bakı İdman Sarayında "Oradea"ya 83:99 hesabı ilə uduzaraq FIBA Avropa Kubokunda ardıcıl dördüncü məğlubiyyətini alıb. Dörd xalı olan Bakı klubu H qrupunda sonuncu yeri tutur.
