Idman.biz
Azərbaycanın 20 yaşadək oğlan basketbolçulardan ibarət millisi FIBA U-20 Avropa çempionatının B divizionunda ilk qələbəsini qazanıb.
İdman.Biz xəbər verir ki, A qrupunda yer alan yığmamız turnirin ikinci oyununda meydan sahibi Slovakiya ilə qarşılaşıb.
Bratislavadakı "GOPASS Arena"da keçirilən görüş Azərbaycan millisinin 72:66 hesablı qələbəsi ilə yekunlaşıb.
Komandamız qarşılaşmanı 72 xal, 46 ribaund, 11 məhsuldar ötürmə, 5 topalma və 3 blokla başa vurub.
Azərbaycan millisinin heyətində Emmanuel Aqbason ən məhsuldar basketbolçu olub. O, 26 xal, 16 ribaund və 3 blokla yadda qalıb. Aqbason görüşü 38 effektivlik xalı ilə tamamlayıb.
Derin Berköz 14 xal, 5 ribaund, 4 məhsuldar ötürmə və 2 topalma ilə fərqlənib. Onun effektivlik göstəricisi 4 xal olub.
Ramazan Qarayev 10 xal və 4 ribaundla 9 effektivlik xalı toplayıb. Murad Babayev isə 10 xal, 2 ribaund və 2 məhsuldar ötürmə ilə komandasının qələbəsinə töhfə verib. O, matçı 4 effektivlik xalı ilə başa vurub.
Millimiz turnirin ilk turunda İsveçə 58:85 hesabı ilə məğlub olmuşdu.
Azərbaycan yığması növbəti oyununu iyulun 14-də İrlandiyaya qarşı keçirəcək. Bratislavadakı "GOPASS Arena"da təşkil olunacaq qarşılaşma Bakı vaxtı ilə saat 22:30-da başlayacaq.
12:20
Azərbaycanın 20 yaşadək oğlanlardan ibarət basketbol millisi FIBA U-20 Avropa çempionatının B divizionunda növbəti oyununu keçirəcək.
İdman.Biz xəbər verir ki, A qrupunda yer alan komandamız ikinci turda yarışın ev sahibi Slovakiya yığması ilə qarşılaşacaq.
Millimiz turnirin ilk oyununda İsveçlə üz-üzə gəlib. Qarşılaşma rəqibin 85:58 hesablı qələbəsi ilə başa çatıb.
Azərbaycan yığması Slovakiyaya qarşı görüşdə ilk turdakı məğlubiyyətin əvəzini çıxmağa və qrupda ilk qələbəsini qazanmağa çalışacaq.
Qeyd edək ki, Slovakiya ilə oyundan sonra millimizin növbəti rəqibi İrlandiya olacaq. Qarşılaşma iyulun 14-də keçiriləcək.
