UEFA Avropa Liqasının 1/4 final mərhələsinin cavab oyununda Eintracht Frankfurt bu axşam öz meydanında Tottenham Hotspur komandasını qəbul edəcək. Londonda keçirilən ilk oyunda 1:1 hesablı bərabərlik qeydə alınıb və bu nəticə hər iki komandanın növbəti mərhələyə çıxmaq şansını qoruyur.
Frankfurt bu mövsüm Avropa Liqasında evdə keçirdiyi son üç oyunun hamısında qələbə qazanıb və bu görüşlərdə 7 qol vurub. Komandanın gənc hücumçusu Hugo Ekitike, turnirdə 4 qol və 3 assistlə parlaq çıxış edir və bu qarşılaşmada da əsas ümidlərdən biridir.
Tottenham üçün isə son zamanlar səfər oyunları uğurlu keçmir. Komanda son 7 səfər görüşünün 6-da məğlub olub və onların 4-də qol vurmağı bacarmayıb. Üstəlik, komandanın kapitanı Son Heung-min bu qarşılaşmanı zədə səbəbindən buraxacaq. Bu, London klubunun hücum potensialını xeyli zəiflədir.
Tottenham-ın baş məşqçisi Ange Postecoglou, bu oyunun komanda üçün "mövsümün ən həlledici matçı" olduğunu bildirib. Qarşılaşmanın qalibi yarımfinalda Lazio və ya Bodø/Glimt ilə qarşılaşacaq.
