Idman.biz
Turan" Voleybol Klubunun prezidenti Həsən Zeynalov qadın və kişi voleybolu arasındakı fərqlərdən, "Turan Tovuz"un son məğlubiyyətindən və komandaya legioner oyunçuların cəlb olunması zamanı qarşılaşdıqları çətinliklərdən danışıb.
İdman.Biz-in Tovuza ezam olunmuş əməkdaşının məlumatına görə, Həsən Zeynalov bu fikirləri voleybol üzrə Çempionlar Liqasının ikinci təsnifat mərhələsinin oyunu öncəsi keçirilən mətbuat konfransında səsləndirib.
Klub prezidenti qadın voleybolunun daha baxımlı olduğunu düşündüyünü bildirib:
"Qadın voleybolu ilə kişi voleybolu arasında böyük fərq var. Kişi voleybolunda fiziki güc önəm daşıyır, qadın voleybolunda isə kombinasiyalar daha vacibdir. Buna görə də qadın voleybolu daha zərif və baxımlı görünür".
Klub rəhbəri "Turan"ın heyətinə legioner voleybolçuların cəlb olunması prosesinin də asan keçmədiyini vurğulayıb. Onun sözlərinə görə, bu zaman gözlənilməz çətinliklərlə qarşılaşıblar:
"Bəli, çətin oldu. Gözləmədiyimiz çətinliklərlə qarşılaşdıq. Onlara müəyyən vədlər vermişdik. Legionerlər Azərbaycana gələndə isə ölkəmizin möhtəşəm yer olduğunu gördülər".
Zeynalov "Turan"ın kapitanı Ayşən Abduləzimovanın Azərbaycan millisində jurnalistlərlə yaşadığı insidentə də münasibət bildirib. O, baş verənlərdən xəbərdar olduğunu və voleybolçu ilə bu barədə söhbət apardıqlarını qeyd edib:
"Belə anlaşılmazlıqlar hər yerdə yaşana bilər. Nəzərə almaq lazımdır ki, o, xanımdır və məsələnin üzərinə çox getmək düzgün deyil. Ayşənlə bu barədə danışmışıq. Söz verirəm ki, belə hal bir daha təkrarlanmayacaq. Sizdən də xahişim odur ki, bu məsələdə onun üzərinə çox getməyəsiniz".
"Turan Tovuz" futbol klubunun vitse-prezidenti vəzifəsini də icra edən Zeynalov İdarə Heyətinin sədri Ehtiram Quliyevi əvəzləyəcəyi barədə yayılan iddialara aydınlıq gətirib. Klub rəsmisi bu məlumatların həqiqəti əks etdirmədiyini vurğulayıb:
"Məni bu vəzifəyə Ehtiram müəllim təyin edib. O, klubda fəaliyyətini davam etdirdiyi müddətdə mən də burada olacağam. Ehtiram müəllim nə vaxt ayrılsa, mən də onunla birlikdə gedəcəyəm. Bundan başqa, "Turan Tovuz"un bütün oyunlarını izləməyə çalışacağam".
Zeynalov komandanın son nəticələrinə də toxunaraq "Turan Tovuz"un qeyri-sabit çıxış etməsi barədə fikirlərlə razılaşmadığını bildirib. O, "İmişli"yə məğlubiyyətdən narazı qaldığını gizlətməyib:
"Dünən "İmişli"yə qarşı oyunun nəticəsi məni də qane etmədi. Bu qarşılaşmada məğlub olmamalı idik. Ancaq komandanın çıxışını yalnız bir oyunun nəticəsinə əsasən qiymətləndirmək düzgün deyil. İnanıram ki, vəziyyəti dəyişə biləcəyik".
