İdman.biz
Sentyabrın 10-23-də Macarıstanın paytaxtı Budapeştdə keçiriləcək Ümumdünya Şahmat Olimpiadasının proqramı açıqlanıb.
İdman.biz xəbər verir ki, Təşkilat Komitəsi turların vaxtını müəyyənləşdirib.
Yarışın ilk turu sentyabrın 11-də, sonuncu turu isə ayın 22-də oynanılacaq. Sentyabrın 10-da təntənəli açılış mərasimi və kapitanların görüşü olacaq.
Turnirin gedişində bir gün istirahət veriləcək. Bu, ayın 17-nə təsadüf edəcək.
Olimpiada Macarıstanın ən müasir mərkəzlərindən biri olan, hər il 120-dən çox tədbirə ev sahibliyi edən və 10 minə qədər insanı qəbul edə bilən "BOK Sports Hall"da keçiriləcək.
Olimpiada rekordları bir araya gətirəcək. Kişilərin yarışında 193, qadınlarda isə 181 komanda mübarizə aparacaq. İki il əvvəl Çennai Olimpiadasında 188 kişi və 162 qadın komandası çıxış edib.
Qeyd edək ki, Azərbaycanın kişilərdən ibarət yığmasında Şəhriyar Məmmədyarov, Rauf Məmmədov, Nicat Abasov, Məhəmməd Muradlı və Aydın Süleymanlı, qadınlarda isə Günay Məmmədzadə, Ülviyyə Fətəliyeva, Gövhər Beydullayeva, Xanım Balacayeva və Gülnar Məmmədova yer alacaqlar.
İdman.biz
