İdman.biz
Sentyabrda Ümumdünya Şahmat Olimpiadasında iştirak edəcək qadın şahmatçılardan ibarət Azərbaycan milli komandasıyla görüş keçirilib.
Şahmat Federasiyasından İdman.bizə verilən məlumata görə, görüşdə milli komandanın üzvləri Günay Məmmədzadə, Ülviyyə Fətəliyeva, Gövhər Beydullayeva, Gülnar Məmmədova, Xanım Balacayeva, eləcə də kapitan Mixail Şereşevski və məşqçi Yevgeni Tomaşevski iştirak ediblər.
Əvvəlcə şahmatçılar qatıldıqları son turnirlər barədə danışıblar. Ardınca kapitan Mixail Şereşevski və məşqçi Yevgeni Tomaşevski olimpiadaya hazırlığın son mərhələsi barədə fikirlərini bildirib.
Olimpiadaya hazırlığın gedişatı ilə maraqlanan Azərbaycan Şahmat Federasiyasının prezidenti Mahir Məmmədov təlim-məşqlərlə bağlı milli komandaya bundan sonra da lazımi şəraitin yaradılacağını deyib.
Görüş zamanı avqust ayı üçün nəzərdə tutulan hazırlıq planı və olimpiadayla bağlı digər məsələlər müzakirə edilib.
Qeyd edək ki, Ümumdünya Şahmat Olimpiadası 10-23 sentyabr tarixlərində Macarıstanda keçiriləcək.
İdman.biz
