Idman.biz
Bu həftəsonu Batumidə qadınlar arasında şahmat üzrə Dünya kubokunun bir aylıq marafonu başlayacaq. İyulun 6-dan etibarən dörd həftə ərzində dünyanın ən güclü şahmatçıları yalnız titul uğrunda deyil, həm də İddiaçılar Turnirinə vəsiqə qazanmaq üçün mübarizə aparacaqlar. İlk üçlükdə qərarlaşanlar bu hüququ əldə edəcəklər.
İdman.biz xəbər verir ki, ənənəyə uyğun olaraq nokaut sistemində keçiriləcək yarışda ümumilikdə 107 şahmatçı çıxış edəcək.
Sonuncu dəfə bu turnir iki il əvvəl Bakıda baş tutmuşdu. Həmin vaxt paralel olaraq kişilər arasında da Dünya Kuboku keçirilmiş və azərbaycanlı şahmatçı Nicat Abasov üçüncü yeri tutaraq İddiaçılar Turnirinə vəsiqə qazanmışdı. Adətən Dünya kubokları hər iki kateqoriya üzrə eyni ildə keçirilir. Qadınlar artıq Gürcüstanın Acarıstan bölgəsinə yollanmağa hazırlaşsalar da, kişilər arasında payızda keçirilməsi planlaşdırılan yarışın yeri hələ müəyyənləşməyib.
Hazırda isə bütün diqqətlər Batumidədir. Burada dörd azərbaycanlı şahmatçı da mübarizə aparacaq. Püşkatmanın nəticələrinə görə, 1-ci mərhələdə Gövhər Beydullayeva İran təmsilçisi Anahita Zahedifarla, Ülviyyə Fətəliyeva Avstraliyadan Jilinq Janqla, Xanım Balacayeva qazaxıstanlı Elnaz Kaliaxmetlə, Gülnar Məmmədova isə çinli Yunşan Li ilə qarşılaşacaq.
Hər mərhələyə iştirakçılara üç gün vaxt veriləcək: əvvəlcə rənglərin növbələşməsi ilə iki klassik oyun, ehtiyac yaranarsa isə tay-breyk oynanılacaq. Nokaut formatını nəzərə alsaq, hər mərhələ favoritlər üçün ciddi sınaqlarla və sürpriz nəticələrlə yadda qala bilər. 107 şahmatçıdan 86-sı mübarizəyə birinci mərhələdən başlayacaq, ən yüksək reytinqə malik 21 oyunçu isə yarışa birbaşa ikinci mərhələdən qoşulacaq.
Oyunlar beşulduzlu "Grand Bellagio Convention & Casino Hotel"də keçiriləcək. Hazırda bu məkanda 8–12 yaşlı uşaqlar arasında təşkil olunan yeniyetmələrin Dünya kuboku da davam edir. Orada 40 ölkədən 300 iştirakçı mübarizə aparır.
Qadınlar arasında Dünya kubokunun ümumi mükafat fondu 691250 ABŞ dolları təşkil edir və qalibə 50 min dollar veriləcək. Bundan əlavə, əsas hədəflərdən biri də İddiaçılar Turnirinə ayrılmış üç vəsiqədən birini qazanmaqdır ki, bu da şahmat tacı uğrunda mübarizə şansı deməkdir.
Lakin bu fürsətə yaxınlaşmaq üçün şahmatçılar beş mərhələ keçməli və ən azı yarımfinala kimi irəliləməlidirlər.
İdman.biz
