2025-ci ildə keçirilən və 100 min funt sterlinqdən artıq vəsait toplayaraq böyük uğur qazanan Belfry Classic Golf Day 2026-cı ildə yenidən təşkil olunacaq. The Belfry Hotel & Resort tərəfindən keçirilən bu prestijli tədbirin idman, media və biznes sahəsindən tanınmış simaları bir araya gətirərək xeyriyyə məqsədləri üçün əhəmiyyətli vəsait toplaması gözlənilir.
Yalnız dəvət əsasında keçirilən turnir mayın 21-də qolf tarixində xüsusi yerə malik Brabazon meydançasında baş tutacaq. Britaniya Masters turnirinə ev sahibliyi etmiş və dörd dəfə Ryder Cup yarışlarına ev sahibliyi edən bu məkan tədbir üçün simvolik seçim hesab olunur.
Mükafatlı jurnalist və televiziya aparıcısı Den Uoker ötən il olduğu kimi bu il də tədbirin aparıcısı olacaq. Turnir dörd nəfərlik komanda formatında keçiriləcək və Böyük Britaniyanın məşhur simaları qolfun ən prestijli meydançalarından birində bacarıqlarını nümayiş etdirəcəklər.
The Belfry Hotel & Resort-un idarəedici direktoru Kris Ayqlar bildirib ki, ötən il keçirilən ilk tədbir sponsorlar və qonaqlar üçün gözləntiləri üstələyib və 2026-cı ildə marağın daha da artacağı proqnozlaşdırılır.
Qolf yarışları ilə yanaşı, tədbir çərçivəsində The Ritz London-un Michelin ulduzlu aşpazı Con Uilyams MBE tərəfindən hazırlanacaq xüsusi gala-şşam yeməyi təşkil olunacaq. Böyük Britaniyada ən nüfuzlu aşpazlardan biri hesab edilən Uilyams axşamın yüksək səviyyəli qonaqpərvərlik proqramına öz peşəkar kulinariya üslubunu qatacaq.
Tədbirdən əldə edilən gəlir iki əsas xeyriyyə tərəfdaşına yönəldiləcək: motor neyron xəstəliyi ilə mübarizə aparan şəxslərə və ailələrə dəstək göstərən MND Association və çətin vəziyyətdə olan qonaqpərvərlik sektoru əməkdaşlarına maliyyə və psixoloji yardım təqdim edən Hospitality Action təşkilatı.
