Idman.biz
Bu yaxınlarda başa çatan güləş üzrə Azərbaycan çempionatı yığma komandanın məşqçiləri üçün nə ilə yadda qaldı? Milli komandaya yeni namizədlər meydana çıxdımı?
Bu sualları İdman.Biz-ə Azərbaycan yığmasının Yunan-roma güləşi üzrə məşqçisi, Olimpiya Oyunlarının ikiqat gümüş mükafatçısı Rövşən Bayramov cavablandırıb.
R.Bayramov qeyd etdi ki, güləş üzrə son Azərbaycan çempionatı yığmanın aparıcı idmançılarının əksəriyyətinin iştirak etməməsinə baxmayaraq, maraqlı görüşlərlə və gələcək vəd edən güləşçilərin ortaya çıxması ilə yadda qaldı.
"Məsələn, 60 kq çəki dərəcəsində özündən qat-qat təcrübəli güləşçilər üzərində inamlı qələbə qazanan Ayxan Cavadovu qeyd etmək olar. Onun Ziyad Zeynalovla final qarşılaşması turnirin əsl bəzəyinə çevrildi. Eyni sözləri 63 kq çəki dərəcəsində Ziya Babaşovla Sakit Quliyev arasındakı duelə də aid etmək olar ki, burada gərgin mübarizədə qalib Sakit oldu. Təbii ki, çempionat Əhmədiyev qardaşlarının final görüşü ilə də yadda qaldı – bu, güləşdə unikal hadisədir, belə ki, bu səviyyəli turnirdə "qızıl" medal uğrunda doğma qardaşlar mübarizə apardılar", – deyə Rövşən Bayramov qeyd edib.
