Idman.biz
Azərbaycanın batut gimnastikası üzrə yığma komandası beynəlxalq startlara hazırlığa başlayıb. Qarşıdakı mövsümü olimpiya kvalifikasiyası ərəfəsində həlledici sınaq mərhələsi adlandırmaq olar.
Komanda eyni vaxtda Los-Anceles Olimpiadasına bir neçə lisenziya uğrunda mübarizə aparmağı planlaşdırır ki, bu barədə İdman.Biz-ə yığmanın baş məşqçisi Vladimir Şulikin məlumat verib.
O xatırladıb ki, Batut gimnastikasında mövsüm ənənəvi olaraq Bakıda açılacaq – 21–22 fevral tarixlərində Milli Gimnastika Arenasında Dünya Kuboku keçiriləcək. Turnirə artıq on ölkədən idmançılar qeydiyyatdan keçiblər və say baxımından ən böyük heyətlə amerikalılar iştirak edəcəklər, onlar Bakıya 16 atlet gətirəcəklər.
"Bakıda keçiriləcək Dünya Kubokuna hələlik çox sayda komanda müraciət etməyib, lakin bu, mövsümün başlanğıcı üçün xarakterik haldır. Hələ hamı optimal formaya düşməyib, buna görə də ev turnirinə planlı şəkildə hazırlaşacaq və bütün iş həcmini yerinə yetirəcəyik. Proqramın bütün növlərində – həm fərdi, həm də sinxron tullanışlarda çıxış edəcəyik. Azarkeşlər həm Selcan Maqsudovanı, həm də Maqsud Maqsudovu iş başında görə biləcəklər", – deyə A.Şulikin bildirib.
Baş məşqçisi söyləyib ki, komanda üçün ilk səfər yarışı isə 12–13 mart tarixlərində Niderlandın Alkmaar şəhərində keçiriləcək Dünya Kuboku mərhələsi olacaq. Bu turnir ilin birinci yarısının əsas startı sayılan, aprel ayında Portimaoda keçiriləcək Avropa çempionatına hazırlıq xarakteri daşıyacaq.
"Portuqaliyaya geniş heyətlə yollanmağı planlaşdırırıq – tamburinq üzrə komanda ilə birlikdə ümumilikdə 20 idmançı olacaq. Çempionatda təkcə əsas yığma deyil, həm də gənclər çıxış edəcək və onlar da yüksək yerlər uğrunda mübarizə aparacaqlar", – deyə məşqçi əlavə edib.
O qeyd edib ki, mövsümün gedişində komanda yenidən Portuqaliyaya qayıdacaq – 4–5 iyul tarixlərində Koimbrada Dünya Kuboku keçiriləcək. Ondan əvvəl isə 26–27 iyun tarixlərində İsveçrənin Arosa şəhərində Dünya Kuboku mərhələsi baş tutacaq. Təqvimdə daha iki Dünya Kuboku mərhələsi də yer alıb – oktyabr ayında "uçan gimnastlar" İtaliya və Almaniyada çıxış edəcəklər. Bu yarışlar idmançıları ilin əsas startına – 5–8 noyabr tarixlərində Nankində keçiriləcək dünya çempionatına hazırlayacaq. Qeyd edək ki, Çində həmçinin yeniyetmələr arasında dünya çempionatı və yaş qrupları üzrə dünya yarışları da təşkil olunacaq.
V.Şulikin mövsümün spesifik xüsusiyyətlərini də açıqlayıb.
"Bu il hazırlıq ilidir – texnika, hündürlük üzərində işləyəcəyik, tullanmaların çətinlik səviyyəsi isə artıq mövcuddur. Növbəti mövsümdə start götürəcək olimpiya seçmə mərhələsini nəzərdə saxlayırıq. Lisenziyalar Dünya Kuboku mərhələlərinin nəticələrinə, eləcə də dünya çempionatına əsasən qazanılacaq. Nə qədər tez vəsiqə əldə etsək, Olimpiadaya hazırlıq bir o qədər sakit və sistemli şəkildə aparıla bilər. Planlarımızda Los-Ancelesə iki vəsiqə qazanmaq var", – deyə baş məşqçi fikrini yekunlaşdırıb.
