Idman.biz
Azərbaycanı fiqurlu konkisürmənin buz üstündə rəqs növü üzrə təmsil edən Samanta Ritter və Daniel Brikalov dueti Avropa çempionatına başlamazdan əvvəl yerli azarkeşlərə müraciət ediblər.
İdman.Biz üçün xüsusi hazırlanmış videoda idmançılar əvvəlcə Bolqarıstanda keçirilmiş "Sofia Trophy" turnirindəki çıxışlarını şərh ediblər. Həmin turnirdə onlar 171,75 xal toplayaraq bürünc medal qazanıblar.
"Bürünc medal qazandığımız üçün çox sevinirdik və çıxışımız nəticəsində Azərbaycan bayrağının fəxri kürsüdə qaldırılmasını görməkdən hədsiz qürur duyuruq", - deyə Samanta Ritter bildirib.
Daniel Brikalov qeyd edib ki, hazırda onlar Böyük Britaniyanın Şeffild şəhərində keçirilən Avropa çempionatındadırlar:
"Azərbaycanı dünya idman arenasında təmsil etmək bizim üçün böyük şərəfdir. Hamını bizə azarkeşlik etməyə dəvət edirik".
Ritter əlavə edib ki, azarkeşlərin dəstəyinə minnətdardır və ümid edir ki, onların Avropa çempionatındakı çıxışı Azərbaycan tamaşaçılarına xoş gələcək.
Qeyd olunmalıdır ki, idmançılar azarkeşləri həm salamlayarkən, həm də sağollaşarkən Azərbaycan dilində danışıb.
