Idman.biz
Azərbaycanlı fiqurlu konkisürən Nərgiz Süleymanova Böyük Britaniyanın Şeffild şəhərində keçirilən Avropa çempionatında çıxış edərək həm ümumilikdə ölkə idmanı, həm də fiqurlu konkisürmə tarixinə adını yazdırıb. O, fiqurlu konkisürmə üzrə Avropa çempionatında çıxış edən ilk azərbaycanlı qadın kimi tarixə düşüb.
İdman.Biz xəbər verir ki, Süleymanova qitə birinciliyində qısa proqramla çıxış edib və 46,60 xal toplayaraq 38 iştirakçı arasında 30-cu yeri tutub. Azərbaycanlı fiqurlu konkisürən mübarizəni sərbəst proqramda davam etdirəcək ilk 24 idmançı sırasına düşə bilməyib.
Qısa proqramdan sonra liderliyi Estoniya təmsilçisi Niina Petrokina 70,61 xalla ələ alıb. Növbəti yerlərdə isə Nina Pinzarrone (Belçika) – 64,97 xal və Anna Petssetta (İtaliya) - 64,85 xal ilə qərarlaşıb.
Qeyd edildiyi kimi, Nərgiz Süleymanova fiqurlu konkisürmə üzrə Avropa çempionatında çıxış edən ilk azərbaycanlı qadın olub. Daha əvvəl Azərbaycan qitə çempionatlarında bu idman növündə yalnız naturalizasiya olunmuş idmançılar tərəfindən təmsil edilirdi.
Şeffilddə qadınların tək konkisürməsi üzrə final mərhələsinə vəsiqə qazana bilməməsinə baxmayaraq, azərbaycanlı idmançının inkişafını qeyd etməmək mümkün deyil. Xüsusilə nəzərə alsaq ki, Avropa çempionatında iştirak avtomatik şəkildə verilmir və sırf idman prinsipi əsasında qazanılır. Əldə olunan təcrübəni nəzərə alaraq, növbəti mövsümdə Nərgiz Süleymanovadan təkcə qitə birinciliyində daha yaxşı nəticə deyil, həm də dünya çempionatında layiqli çıxış gözləmək olar.
Əlavə edək ki, Süleymanova ilə yanaşı, Şeffilddə keçirilən Avropa çempionatında Azərbaycanı həmçinin buz üzərində rəqslər yarışında çıxış edən Samanta Ritter və Daniyel Brıkalov da təmsil edir.
