Idman.biz
Ağır atletika üzrə dəfələrlə Azərbaycan çempionu, İkinci Qarabağ müharibəsinin veteranı Asxab Kalayev qarşıdan gələn ağır atletika üzrə Azərbaycan çempionatında çıxış etməyi planlaşdırır.
İdman.Biz-ə açıqlamasında hazırda Azərbaycan Deflimpiya Oyunları Komitəsində şöbə müdiri vəzifəsində çalışan 27 yaşlı Asxab Kalayev bildirib ki, o, sadəcə olaraq yarış meydanına qayıtmaq deyil, yeddi ildən sonra yenidən qalib olmaq əzmindədir.
"Mən son dəfə ölkə çempionatında müharibədən bir qədər əvvəl, 2019-cu ildə çıxış etmişdim və 110 kiloqramdan yuxarı çəki dərəcəsində çempion olmuşdum. İndi isə sadəcə qayıtmaq yox, yeddi il əvvəlki uğurumu təkrarlamaq istəyirəm. Əks halda qayıtmağın nə mənası var? Artıq daha intensiv məşqlərə başlamışam və gələn ilin fevral ayının sonu və ya mart ayının əvvəlində keçirilməsi nəzərdə tutulan çempionata qədər forma yığacağıma ümid edirəm. Daha sonrasını indidən demək istəmirəm - hər şey ölkə çempionatında göstərəcəyim nəticədən asılı olacaq", - deyə Asxab Kalayev qeyd edib.
