Idman.biz
"Çox həyəcanlı oyun keçdi. Möhtəşəm atmosfer, yüksək səviyyəli təşkilatçılıq. Həzz aldıq oyundan. Komandamız uduzsaydı da, biz onlarla qürur duyacaqdıq. Çünki qələbə üçün əllərindən gələni etdilər".
İdman.biz xəbər verir ki, Futbolxeber.az saytına açıqlamasında bu sözləri "Zirə"nin baş məşqçisi Rəşad Sadıqov minifutbol üzrə milli komandamızın dünya çempionatının 1/8 finalında Rumıniya məğlub etməsi barədə danışarkən deyib.
O, komandamızın sona qədər mübarizə apardığını söyləyib: "Möhtəşəm dəstək var idi, azarkeşlərimiz super idi. Futbolçularımız da sona qədər mübarizə apardılar. Qarşılarında çox güclü kollektiv var idi. Rumıniya dünya çempionudur və bu, meydanda hiss olunurdu. Stresli, həyəcanlı oyun keçdi. Sevindirici haldır ki, favoritlərdən biri üzərində qələbə qazandıq".
Sadıqov Azərbaycan Minifutbol Federasiyasının bu idman növünün inkişafı üçün böyük işlər gördüyünü vurğulayıb: "Minifutbol son illər Azərbaycanda sürətlə inkişaf edir, böyük diqqət ayrılır. Millimizin Avropa çempionu olması, "Birbaşa Bakı"nın Çempionlar Liqasını qazanması bu işlərin nəticəsidir. Necə deyərlər, gördükləri işlərin bəhrəsini görürlər. Çox istərdim dünya çempionu olsunlar. Təbii ki, idmanda hər bir nəticə qeydə alına bilər. İstənilən halda biz qalibik. Bakıda bu səviyyədə dünya çempionatının keçirilməsi böyük uğurdur. Qonaqlar hamısı təşkilatçılığı xüsusi qeyd edirlər. Bu dünya çempionatı futbolumuz üçün təkandır".
İdman.biz
