Idman.biz
Minifutbol üzrə Gürcüstan millisinin baş məşqçisi Kaxa Maysayanın Sportal.az-a müsahibəsi
- Gürcüstan millisi dünya çempionatına necə hazırlaşıb? Sizi narahat edən hansısa məqamlar var?
- Dünya çempionatına yaxşı hazırlaşmışıq. Bizim gənc komandamız var. Bəzi futbolçularımız isə təcrübəlidir. Çox maraqlı komandaya sahibik. Bütün rəqiblərlə mübarizə aparmağa hazırıq.
- Maraqlıdır, komandada peşəkar karyerası olmuş keçmiş futbolçular var?
- Demək olar ki, hamısı aktiv futbolçulardır. Həm futzalda oynayanlar var. Üstəlik, iki oyunçu da əvvəllər böyük futbolda çıxış edib.
- Sən uzun illər Azərbaycanda oynamısan. Yenidən sənin üçün yad olmayan Bakıya qayıtmısan...
- Tbilisidən sonra mənim üçün ikinci doğma şəhər Bakıdır. Bakını çox sevirəm və hər zaman darıxıram. Çünki orada mənim dostlarım var. Futboldan sonra da onlarla dostluq əlaqələrim davam edir. Bakıya baş məşqçi kimi geri qayıtmaq özüm üçün də maraqlı və həyəcanlıdır.
- Gürcüstan millisinin Bakıdakı turnirdə əsas hədəfi nədən ibarətdir? Çempionluğu real görürsüz?
- Nə qədər uzağa gedə bilsək, özümüz üçün yaxşıdır. Ambissiyalı və gənc komandamımız var. Bu mənada, hər bir rəqiblə sona qədər mübarizə aparacağıq. Bütün komandalara hörmətlə yanaşırıq. Fikrimcə, məğlub edə bilməyəcəyimiz rəqib yoxdur.
- Ev sahibi olan Azərbaycan millisi haqda hansı fikirdəsən? Avropa çempionu olduqdan sonra Azərbaycanda minifutbol inkişaf edir. Azərbaycan minifutbolu ilə maraqlanırdın?
- Çox güclü milli komandaya sahib olduğunuzu hamımız bilirik. Azərbaycanda minifutbolun çox qısa zamanda inkişaf etməsindən də məlumatlıyıq. Gürcüstandan sonra bütün ürəyimlə Azərbaycana azarkeşlik edəcəm.
- Səncə, çempionatın əsas favoriti hansı komandadır?
- Məncə, Azərbaycan dünya çempionatının əsas favoritlərindən biridir. Üstəlik, ev amili də var. Məncə, bütün Azərbaycan Gürcüstana da dəstək olacaq. Çünki biz qonşu ölkələrik. Üstəlik, bu iki ölkə arasında hər zaman dostluq əlaqələri yüksək olub. Azərbaycana və Gürcüstana uğurlar arzulayıram.
- Gürcüstan G qrupunda Çexiya, BƏƏ və Argentina ilə mübarizə aparacaq. Qrupdan çıxmaq şanslarınızı necə dəyərləndirirsən?
- Təbii ki, qrupdan çıxmaq şansımız var. Bunun üçün ən yaxşısını edəcəyik. Daha da irəliləmək niyyətindəyik. Rəqiblərimizi analiz edirik. Hər şeyi meydanda görəcəyik. Allah qoysa, hər şey yaxşı olacaq.
İdman.biz
