Report.az
Futzal üzrə "Baku Fire" klubunun məşqçisi və kapitanı Elvin Quliyev xarici ölkələrdən təkliflər alıb.
Bunu "Report"a açıqlamasında mütəxəssis özü bildirib.
O, Finlandiyada UEFA tərəfindən təşkil olunan B kateqoriyalı məşqçi kurslarında iştirak edərkən bir neçə ölkədən təkliflər gəldiyini söyləyib:
"Kurslar 1 il davam etdi. Mənim üçün böyük təcrübə oldu. Seminar zamanı İsveçrə, Finlandiya və Latviya kimi ölkələrdən məşqçi kimi işləmək təklifi aldım. Lakin Azərbaycanda futzalla yanaşı, uşaq futbolunda da çalışdığım üçün təklifləri dəyərləndirmədim. Bakıda çoxsaylı tələbələrim var. İnanıram ki, öz ölkəm üçün faydalı olacağam və futzalımızın inkişafı üçün töhfə verəcəyəm".
Qeyd edək ki, Elvin Quliyevin məşqçisi olduğu "Baku Fire" Azərbaycan Yüksək Liqasının 2024/2025 mövsümünü gümüş medalla başa vurub.
