Idman.biz
"Yoxlama matçları çempionat oyunları ilə eyni səviyyədə olmur. Premyer Liqada qarşılaşmalar daha gərgin keçir".
Bu sözləri "Kəpəz"in qapıçısı Yusif İmanov deyib.
Gəncə təmsilçisinin təlim-məşq toplanışınızı dəyərləndirən qolkiper mövsümün ikinci yarısına hazır olduqlarını söyləyib.
"Düşünürəm ki, bu müddətdə məşqçilərin verdiyi tapşırıqları yerinə yetirə bildik. Qış hazırlığımız pis keçməyib. Bilirəm, yoxlama oyunlarında qələbə qazansaydıq, daha yaxşı ola bilərdi. Amma nəzərə almalıyıq ki, bu sadəcə, yoxlama matçlarıdır", - deyə sport24.az-a açıqlamasında deyib.
Y.İmanov fasilədən sonra daha yaxşı çıxış edəcəklərini də söyləyib:
"Komandamız tam hazırdır. Qarşıda bizi gərgin və maraqlı ikinci yarı gözləyir. Əlimizdən gələndən də daha artığını edəcəyik ki, daha yuxarı pillələrə çıxa bilək. Qarşıda xeyli oyun var. Allahın izni ilə ən yaxşı nəticəni qazanacağıq. Heç birimiz "Kəpəz"i autsayder olaraq görmürük. Bu mövsüm nəinki liqada qalmaq, hətta düşünürəm ki, orta sıralarda yer alacağıq".
Qeyd edək ki, "Kəpəz" Misli Premyer Liqasının 17-ci turunda "Qarabağ"ın qonağı olacaq. Matç yanvarın 24-də baş tutuacaq.
