Idman.biz
Bakının "Neftçi" futbol klubunun baş məşqçisi Yuri Vernidub Azərbaycan klubu ilə Moskvanın "Lokomotiv" klubu arasında əməkdaşlıqla bağlı yaranmış vəziyyəti ictimai şəkildə izah etməli olub.
İdman.Biz-in məlumatına görə, 2025-ci ilin dekabr ayının ortalarında "Lokomotiv" akademiyasının "Neftçi" və Minsk "Dinamo"sunun akademiyaları ilə beynəlxalq əməkdaşlıq sazişləri imzaladığı məlum olub.
Memorandum gənc futbolçuların hazırlanmasında təcrübə mübadiləsini, Azərbaycan, Belarus və Rusiyada turnirlərdə iştirakı, məşqçilərin təcrübə keçməsini, təhsil layihələrini və uşaq-gənclər futbolunun inkişafını nəzərdə tutur.
Bu fonda Y. Vernidub öz vətəndaş mövqeyi nəzərə alınmaqla, sözügedən razılaşmaya münasibətini açıqlamaq məcburiyyətində qalıb.
"Jurnalistlər məlumatı süni şəkildə şişirdiblər. Bəzi KİV-lər yazıblar ki, guya mən Moskvaya gedəcəyəm. Bu, ağla sığmır. Bu əməkdaşlıq müqaviləsi uşaq akademiyaları arasında imzalanıb. Bu, klubun hüququdur. Mənim bununla nə əlaqəm var? Əsas komandamızda bir nəfər belə rusiyalı yoxdur. Gənclər komandalarında da yalnız azərbaycanlılar çıxış edir. Burada mən Ukrayna dilində ünsiyyət qururam və sözlərimi futbolçulara və ya müsahibimə tərcüməçi çatdırır", - deyə Sport.ua saytı Vernidubdan sitat gətirir.
Qeyd edək ki, Yuri Vernidub 2025-ci il dekabrın 9-da "Neftçi"nin baş məşqçisi təyin olunub. 2026-cı il yanvarın 22-də ukraynalı mütəxəssisin 60 yaşı tamam olacaq.
