Idman.biz
İngiltərənin "Aston Villa" futbol komandasının baş məşqçisi Unay Emeri UEFA Çempionlar Liqasında İspaniyanın "Barselona" klubu ilə keçiriləcək oyun öncəsi futbolçularına xəbərdarlıq edib.
İdman.Biz İspaniyanın "Sport" nəşrinə istinadən xəbər verir ki, mütəxəssis İngiltərə Premyer Liqasında "Fulhem"lə heç-heçədən sonra komandasının çıxışından narazı qaldığını bildirib.
İspaniyalı baş məşqçi xüsusilə ikinci hissədə futbolçularının oyuna nəzarəti itirməsini tənqid edib. Onun sözlərinə görə, "Aston Villa" "Barselona" kimi güclü rəqibə qarşı bu cür səhvlərə yol verməməlidir.
"Mən komandamdan sabit oyun görmək istəyirəm. Çempionatda keçirdiyimiz son beş qarşılaşmanın üçündə qalib gəlmişik, ikisində isə heç-heçə etmişik. Bu, pis nəticə deyil. Amma mövsümə uğursuz başladığımızı nəzərə alsaq, kifayət etmir. Çərşənbə axşamı "Barselona" ilə keçiriləcək oyun üçün düşüncə tərzimizi dərhal dəyişməliyik. İşimizi davam etdirməli və irəli getməliyik", - deyə Emeri bildirib.
Baş məşqçi komandasının oyun ərzində eyni səviyyəni qorumasının vacibliyini də vurğulayıb. O, xüsusilə ikinci hissələrdə baş verən enişlərin aradan qaldırılmasını istəyir.
"Aston Villa" İngiltərə Premyer Liqasında son beş turdur məğlubiyyətlə üzləşmir. Bununla belə, Emeri mövsümün əvvəlində itirilən xalları kompensasiya etmək üçün daha yaxşı nəticələrə ehtiyac olduğunu düşünür.
İspaniyalı mütəxəssis "Kamp Nou"da keçiriləcək qarşılaşmanın komandasını ciddi sınaq gözlədiyini də anlayır.
Qeyd edək ki, "Barselona" bu mövsüm doğma meydanda yalnız bir dəfə məğlub olub. Kataloniya təmsilçisi həmin qarşılaşmada əzəli rəqibi "Real Madrid"ə uduzub.
