“Həmin epizodda topa başla zərbə endirərkən Jo Batista ayağını həddindən artıq yuxarı qaldıraraq mənə çox sərt müdaxilə etdi. Zərbədən sonra kürəyimdə və başımda butsunun şiplərinin izləri qalmışdı. Bu da məndə ağrı və narahatlıq yaratdı”.
Bu sözləri Futbolinfo.az saytına açıqlamasında “Şamaxı”nın futbolçusu Emin Rüstəmov deyib.
22 yaşlı müdafiəçi evdə “Turan Tovuz”a 0:2 hesablı məğlubiyyəti də şərh edib:
“Oyunumuz istədiyimiz kimi alınmadı. Rəqib hesabda 1:0 öndə olarkən azlıqda qaldı. Biz də bundan yararlanmağa çalışsaq da, istəyimizə nail ola bilmədik. Nəticədə 0:2 hesabı ilə məğlub olduq”.
Rüstəmov qarşılaşma ərzində rəqibin sərt oyun nümayiş etdirdiyini də vurğulayıb:
“Futbolda sərt mübarizə normaldır. Lakin bəzən rəqib futbolçular həddindən artıq kobud oynayırdılar. Belə müdaxilələr də xoşagəlməz hallara səbəb ola bilər”.
Son oyunlarda qələbə qazana bilməmələrinin səbəblərinə toxunan futbolçu məğlubiyyətsizlik seriyasını davam etdirmək istədiklərini, lakin buna nail ola bilmədiklərini bildirib:
“Məğlubiyyətsizlik seriyamızı davam etdirmək istəyirdik. Təəssüf ki, son oyunlarda bunu bacarmadıq. Əsas səbəblərdən biri öz səhvlərimizdən qollar buraxmağımızdır. Bunun üzərində işləyəcək, çatışmazlıqlarımızı aradan qaldırmağa və vəziyyəti düzəltməyə çalışacağıq”.
GÜNAY SÜLEYMANOVA