Tomas Frankın "Tottenhem"dəki gələcəyi sual altındadır

İngiltərənin "Tottenhem" klubunda baş məşqçi Tomas Frankın gələcəyi ciddi sual altındadır.

İdman.Biz xəbər verir ki, talkSPORT-un yaydığı məlumata görə, danimarkalı mütəxəssisin vəzifəsindən uzaqlaşdırılması yaxın günlərdə baş verə bilər. Dünən London derbisində "Vest Hem"ə məğlubiyyətdən sonra azarkeşlərin Franki fitə basması vəziyyəti daha da gərginləşdirib.

Mənbənin bildirdiyinə görə, Tomas Frank rəhbərliyin dəstəyini saxladığını düşünsə də, son həftələr klub daxilində əhval-ruhiyyə dəyişib. Klub rəhbərliyi məşqçi heyətində dəyişikliklərin zəruri olub-olmadığını müzakirə edir və idarə heyətində vəziyyətin dözülməz həddə çatıb-çatmadığı qiymətləndirilir.

Qeyd olunur ki, "Tottenhem" yaxın oyunlarda müsbət nəticələr əldə etməsə, danimarkalı mütəxəssis istefaya göndərilə bilər. Artıq potensial əvəzləyicilər də müəyyənləşdirilib. Siyahıda "Bornmut"un baş məşqçisi Andoni İraola və "Kristal Palas"ı çalışdıran Oliver Qlasnerin adları yer alır.

Əsas favorit isə "Tottenhem"in sabiq baş məşqçisi Maurisio Poçettino hesab olunur. Lakin argentinalı mütəxəssisin kluba mümkün qayıdışı yalnız 2026-cı il Dünya Çempionatından sonra baş tuta bilər. Hazırda o, ABŞ milli komandasını çalışdırır.

Xatırladaq ki, Maurisio Poçettino 2014–2019-cu illərdə "Tottenhem"i çalışdırıb, bu müddətdə komandanı Çempionlar Liqasının finalına çıxarıb və Premyer Liqa tituluna çox yaxın olub.