Sport24.az
"Karvan-Yevlax"ın sabiq baş məşqçisi Azər Həşimovla klub arasında yaşanan problem futbol ictimaiyyətinə məlumdur. Noyabrın sonunda postunu itirən 41 yaşlı mütəxəssis müqavilənin birtərəfli qaydada pozulmasına görə Yevlax təmsilçisindən təzminat tələb etsə də, hələ istəyinə nail olmayıb. Bu yerdə ortaya sual çıxır. Klub rəhbərliyi niyə Həşimova təzminat ödəmək istəmir, fikir ayrılığının kökündə nə durur?
Məsələ ilə bağlı Sport24.az-a ilginc məlumat daxil olub. Bizə çatan bilgiyə əsasən, Yevlax təmsilçisinin rəhbəri Şahmar Vəliyev ötən yay komandaya cəlb olunan əcnəbilərin keyfiyyətindən narazıdır. O, yaxın ətrafı ilə söhbətdə "yayda 12 legioner transfer etməklə büdcəni dağıtdılar, ancaq gətirdiklərilərinin əksəriyyətinin səviyyəsi aşağıdır. İndi yeni legioner cəlb etmək üçün 100 min manat rüsum ödəmək lazımdır" söyləyərək, Həşimov və klubun vitse-prezidenti Kənan Kərimovun seleksiyasından razı qalmadığını vurğulayıb. "Ağ-qaralar"ın məhz uğursuz transferlər səbəbindən turnir cədvəlinin zirzəmisində yer alması, büdcənin talan olunması klub prezidentini əsəbləşdirib. Bu səbəbdən Vəliyev Azər bəyin təzminat məsələsinə razılıq vermir.
Mənbəmizin sözlərinə görə, artıq klubda futbolçu seçimi yeni baş məşqçi (hələ rəsmi təsdiqlənməyib) Füzuli Məmmədovun ixtiyarına verilib. Qış "transfer pəncərəsi"ndə bu məsələ ilə Məmmədov məşğul olacaq.
