Sport24.az
"Neftçi"nin veteran futbolçuları – Asif Əliyev və Aydın Ələkbərov "Palms Sports" Futbol Mərkəzində qonağımız olublar. Klub nümayəndələri ilə görüşən Asif Əliyevə 70, Aydın Ələkbərova isə 60 illik yubileyi münasibətilə xatirə hədiyyələri təqdim edilib.
1956-cı il fevralın 10-da Gəncədə dünyaya gələn Əliyev bir müddət doğma şəhərinin "Tərəqqi" klubunda oynayandan sonra "Neftçi"yə dəvət olunub. 1973-cü ildə SSRİ çempionatının birinci dəstəsində "İnşaatçı" (Aşqabad) klubuna qarşı debüt matçındaca qol vuraraq komandamıza 1:0 hesablı qələbə qazandırıb. Həmin mövsümdə meydana çıxdığı 7 oyunda 2 qol vuran hücumçu növbəti mövsümdən etibarən əsas heyət üzvlərindən biri olub.
Ümumilikdə, "ağ-qaralar"ın heyətində keçirdiyi 12 mövsüm ərzində 258 oyunda meydana çıxıb, 43 qola imza atıb.
1985-ci ildə "Neftçi"ni tərk edəndən sonra 6 il "Kəpəz"in şərəfini qoruyub və 1990-cı ildə karyerasını "Göyəzən"də başa vurub.
Daha sonra məşqçiliyə başlayan Asif Əliyev 1995-2000-ci illər ərzində baş məşqçilər – Kazbek Tuayev, Ruslan Abdullayev və Əhməd Ələsgərovun köməkçisi olub, 1996, 1998, 1999-cu illərdə isə komandamızın baş məşqçisi vəzifəsini yerinə yetirib.
1966-cı ildə anadan olan Aydın Ələkbərov isə 5 mövsüm – 1993-1997-ci illərdə "Neftçi"nin şərəfini qoruyub. Bu müddət ərzində 130 rəsmi matçda meydana çıxan müdafiəçi 1996 və 1997-ci illərdə "Flaqman"la Azərbaycan çempionatının, 1995 və 1996-cı illərdə isə ölkə kubokunun qalibi olub.
