Idman.biz
Almaniya futbol millisinin baş məşqçisi Yulian Naqelsmann DÇ-2026-dakı uğursuzluqdan sonra postunu itirməyə yaxındır.
İdman.Biz xəbər verir ki, bu barədə "Bild" məlumat yayıb. Nəşrin yazdığına görə, Almaniya Futbol İttifaqı (DFB) rəhbərliyi ilə keçirilən qapalı görüşdən sonra 38 yaşlı mütəxəssisin gələcəyi ciddi sual altına düşüb.
Naqelsmann DFB prezidenti Bernd Noyendorf, idarəedici direktor Andreas Rettig, idman direktoru Rudi Föller və Bundesliqa rəhbəri Hans-Yoahim Vatske ilə təxminən üç saat yarımlıq görüş keçirib. Görüşdə Almaniya millisinin mundialdakı uğursuzluğu, heyət seçimi və məşqçinin qərarları müzakirə olunub.
"Tagesschau"nun məlumatına görə, yekun qərarın bu gün açıqlanması mümkündür. Hələlik DFB rəsmi şəkildə Naqelsmannın istefaya göndərildiyini elan etməyib.
"Bild" isə qeyd edir ki, Almaniya Futbol İttifaqında artıq Nagelsmannla ayrılıq, ona ödəniləcək təzminat və mümkün varis məsələləri müzakirə olunur. Baş məşqçinin qarşısında əsas seçim könüllü istefa vermək və ya rəsmi şəkildə vəzifədən uzaqlaşdırılmaqdır.
Almaniya millisində baş məşqçi postuna əsas namizəd Yurgen Klopp hesab olunur. Almaniya mətbuatı keçmiş "Liverpul" çalışdırıcısının bu vəzifəyə gəlməyə hazır olduğunu bildirir.
Qeyd edək ki, Almaniya millisi DÇ-2026-nın 1/16 finalında Paraqvaya penaltilər seriyasında uduzaraq turnirlə vidalaşıb.
