Idman.biz
İspaniyanın "Real" futbol klubunda ikinci dönəmini keçirən Joze Mourinyonun davranışındakı dəyişiklik müzakirələrə səbəb olub.
İdman.Biz xəbər verir ki, portuqaliyalı mütəxəssis həm mətbuat konfranslarında, həm də oyunlar zamanı ehtiyat oyunçular skamyasında əvvəlki dövrü ilə müqayisədə daha sakit görünür. Buna baxmayaraq, "Cadena SER" radiosunun jurnalisti Xulio Pulido bu dəyişikliyin davamlı olacağına inanmır.
Pulido hesab edir ki, Mourinyonun hazırkı yanaşması nəticələr pisləşən kimi dəyişəcək:
"Mən buna inanmıram. O, müəyyən yol xəritəsi ilə gəlib, amma işlər pis gedəndə hər şey dağılacaq".
Jurnalistin sözlərinə görə, Mourinyonun mətbuatla münasibətindəki yumşaqlıq da ilk ciddi tənqidlərə qədər davam edə bilər. O bildirib ki, komanda uduzmağa başlayarsa və baş məşqçi tənqid olunarsa, indiki münasibətin dəyişməsi mümkündür.
Pulido Mourinyonun hakimlərlə bağlı son açıqlamalarına da toxunub. Portuqaliyalı mütəxəssis son günlər hakimlik sisteminə güvəndiyini bildirsə də, jurnalist hesab edir ki, "Real"ın əleyhinə bir neçə mübahisəli qərar verildikdən sonra bu mövqenin dəyişməsi mümkündür.
