Idman.biz
Argentina millisinin hücumçusu Lionel Messi karyerasında ilk dəfə dünya çempionatında het-trik müəllifi olub.
İdman.Biz xəbər verir ki, 38 yaşlı futbolçu DÇ-2026-nın J qrupunun ilk turunda Əlcəzair yığması ilə görüşdə üç dəfə fərqlənib. Argentina millisi qarşılaşmada 3:0 hesablı qələbə qazanıb.
Messi dünya çempionatlarında keçirdiyi 27-ci matçda qollarının sayını 16-ya çatdırıb. Onun hesabında, həmçinin səkkiz məhsuldar ötürmə var.
Argentina millisinin kapitanı bu göstərici ilə mundiallar tarixinin ən yaxşı bombardiri olan Almaniya millisinin sabiq hücumçusu Miroslav Klozeyə çatıb. Hər iki futbolçunun aktivində 16 qol var.
Messi 22 iyunda Avstriya ilə keçiriləcək qarşılaşmada fərqlənəcəyi təqdirdə dünya çempionatları tarixinin vahid bombardiri olacaq.
