Luis Enrikenin uşaqlıqdakı "Real"a qarşı münasibəti: "Forma geyinsən, danışmayacağam"

​PSJ-nin baş məşqçisi Luis Enrikenin uşaqlıq illərinə dair maraqlı faktlar ortaya çıxıb. Sport24.az xəbər verir ki, ispaniyalı mütəxəssisin futsal üzrə ilk məşqçisi olmuş Xose Mariya Fernandes de Brito "RMC"yə açıqlamasında onun gənclik dövrü və xarakteri barədə danışıb.

​Məşqçinin sözlərinə görə, Enrike hələ 7 yaşında olarkən güclü liderlik xüsusiyyətləri ilə həmyaşıdlarından seçilib və komandada söz sahibi olub:

"Dəcəllik edəndə Abelardo (Luis Enrikenin uşaqlıq dostu və sabiq komanda yoldaşı – red.) həmişə birinci qaçıb gizlənirdi. Amma Luis fərqli idi. O, əsl lider kimi öndə durur, məsuliyyəti mən daşıyıram və biz belə edəcəyik deyirdi".

De Brito təcrübəli çalışdırıcının uşaq vaxtı "Real"a qarşı olan radikal münasibətini də xatırlayıb. O, "kral klubu"nun azarkeşi olan bir tanışlarının gənc Luisə "ağ forma sənə yaraşar" dediyi anı belə nəql edib:

"Luis dərhal ayağa qalxdı və sərt şəkildə bildirdi: Əgər Real forması geyinsən, səninlə bir daha danışmayacağam".

​Uşaqlıqdakı bu böyük barışmazlığa baxmayaraq, tale elə gətirib ki, Luis Enrikenin peşəkar karyerası məhz "Real"la kəsişib. Keçmiş məşqçisi zarafatla əlavə edib ki, həmin dövrdə "kral klubu"ndan gələn təklifdən imtina etmək imkansız idi.

Bununla belə, De Brito vurğulayıb ki, Enrikenin qəlbi həmişə "Barselona" ilə döyünüb və Madriddə keçirdiyi illər onun üçün psixoloji baxımdan heç də asan olmayıb.

​Qeyd edək ki, hazırda PSJ-yə rəhbərlik edən Luis Enrike Paris təmsilçisi ilə Çempionlar Liqasında ardıcıl ikinci dəfə finala yüksəlməyə hazırlaşır.