Idman.biz
İngiltərənin "Liverpul" futbol klubu yay transfer pəncərəsində 200 milyon funt sterlinqdən çox vəsait xərcləsə də, komandanın heyətində ciddi balans problemi olduğu bildirilir.
İdman.Biz "Sky Sports"a istinadən xəbər verir ki, Andoni İraolanın rəhbərliyi altında qurulan heyətin bəzi mövqelərdə həddindən artıq geniş, digərlərində isə yetərsiz olduğu bildirilir. Klubun PSJ-dən Bredli Barkolanı 123 milyon funt sterlinqə (274 milyon AZN) transfer etməsinə baxmayaraq, sağ cinah, müdafiənin cinahları və yarımmüdafiə xəttində suallar qalır.
"Liverpul"un sabiq futbolçusu Ceymi Karrager də heyətin balanslı olmadığını bildirib. Onun fikrincə, komandanın cinah müdafiəçisi və daha bir yarımmüdafiəçiyə ehtiyacı var. Karrager Məhəmməd Salahın gedişindən sonra sağ cinahda sol ayaqlı, sırf həmin mövqedə çıxış edən futbolçunun olmamasını da əsas problemlərdən biri hesab edir.
Barkola müxtəlif hücum mövqelərində oynaya bilsə də, onun əsasən sol cinahda daha effektiv olduğu qeyd edilir. Kodi Qakpo, Florian Virts, Huqo Ekitike, Rio Nqumoha və Viktor Munyos da daha çox sol cinaha meylli futbolçular kimi göstərilir. Bu səbəbdən hücum xəttinin bir tərəfə yükləndiyi vurğulanır.
Müdafiədə də problemlər var. Konor Bredlinin zədəsi səbəbindən Ceremi Frimponq sağ cinah müdafiəçisi kimi istifadə olunur. İraolanın oyun sistemində cinah müdafiəçilərinin eyni vaxtda irəli çıxması isə yarımmüdafiənin üzərinə əlavə yük qoyur. İlk oyunlarda rəqiblərin əks-hücumlarda yaranan boşluqlardan istifadə etdiyi bildirilir.
Qeyd olunur ki, İraolanın sərəncamında klub tarixinin ən bahalı heyətlərindən biri olsa da, bu komanda son illərin ən problemli balansına malik heyətlərindən biri təsiri bağışlayır.
