Sport24.az
Misli Premyer Liqasının XXXIII turunun "İmişli" – "Karvan-Yevlax" oyunundan (1:1) sonra qonaq komandanın baş məşqçisi Füzuli Məmmədov jurnalistlərin suallarını cavablandırdı. Sport24.az xəbər verir ki, mütəxəssis əvvəlcə görüşlə bağlı fikirlərini bölüşdü:
– Nəticənin turnir cədvəli baxımından mahiyyəti olmasa da, qələbə qazanmaq istəyirdik. Meydanda yaxşı mübarizənin şahidi olduq. Ağır yol keçdik, mövsüm bitdi. Təəssüf ki, komandamız I Liqaya yuvarlandı. Oyuna gəlincə, futbolçular meydanda əziyyət çəkdi. Yekunda istədiyimizə nail ola bilmədik. Hər kəsə uğurlar arzu edirəm.
– Komanda ilə davam edəcəksinizmi? Edəcəksinizsə, heyətdə nə qədər dəyişiklik olacaq?
– Çox istəyirəm ki, I Liqada iddialı olaq, yenidən Premyer Liqaya qayıdaq. Arzum budur. Yəqin, sabah rəhbərliklə görüşümüz olacaq. Şərtlərim, tələblərim qəbul olunsa, davam edəcəyəm. Bu heyətdə yaxşı futbolçular var. Şərtlər də yaxşı olsa, onlarla da danışılacaq.
– Samuel Durrantın oyununu necə dəyərləndirirsiniz?
– Bir oyuna görə futbolçunu şərh etmək istəmirəm. Meydanda əzmkar oyun gedirdi. Rəqib böyük təzyiqlə üzərimizə gəlirdi. Durrant keyfiyyətli oyunçudur, ancaq bu gün ondan istədiyimi ala bilmədim. Həm də futbolçular üçün belə matçlarda psixoloji çətinlik olur. Komanda liqadan düşüb, iddia qalmayıb. Ruh düşkünlüyü normaldır. Durrantı başa düşürəm, klubla müqaviləsi başa çatıb. Ona uğurlar arzu edirəm.
– Başqa təklifləriniz var?
– Əvvəlcə klubun rəhbərliyi ilə danışacam. Bu görüşdən çox şey asılıdır.
– Mövsümlə bağlı fikirləriniz nədir?
– Səmimi deyirəm, nəticəyə görə üzgünəm, belə şeyləri sevmirəm. Ağır mövsüm keçirdik. Heyfislənmirəm, böyük təcrübə qazandıq. Premyer Liqada lazımi yol keçdik. Karyeram üçün yaxşı təcrübəm oldu, möhkəmləndim, məşqçi kimi çox şey gördüm. Amma yenə deyirəm, istəməzdim belə olsun. Çox çalışdım ki, komanda liqada qalsın. Premyer Liqa haqqında danışası olsaq, maraqlı mövsüm keçdi. "Neftçi"nin, "Sabah"ın, "Turan Tovuz"un oyunlarını qeyd etmək olar. Avrokuboklarda olacaq komandalara uğurlar arzu edirəm. Sürətli çempion oldu.
