Idman.biz
Kamerun Futbol Federasiyasının prezidenti Samuel Eto"O Avropa futbol assosiasiyalarının Afrikadakı həmkarlarının üzləşdiyi problemləri başa düşməyəcəyini bildirib.
İdman.Biz xəbər verir ki, Eto"O-nun sözlərini "RMC Sport" dərc edib.
"Biz avropalılarla heç vaxt məsələlərə eyni cür baxmayacağıq. Büdcəsi 150 min avro (297 min AZN) olan bəzi federasiyalara nəzər salsaq, onlar böyük dövlətlərlə necə rəqabət apara bilərlər?
Heç kim bəzi Afrika federasiyalarının rəhbərlərinin öz ölkələrində futbolu necə idarə etdiyini soruşmur. İstedad axını baş verəndə isə günah bizim üzərimizə düşür. Amma Kamerunun illik 20 və ya 40 milyon dollar (34 - 68 milyon AZN) büdcəyə güvənmək imkanı olsaydı, əlbəttə, bizim də öz Mbappelərimiz və Tçuamenilərimiz olardı. Biz futbolumuzu daha yaxşı təşkil edərdik", - deyə Kamerun Futbol Federasiyasının prezidenti Samuel Eto"O bildirib.
Qeyd edək ki, iyulun sonunda FIFA-nın dünya çempionatının yayım və kommersiya hüquqlarının satışı üçün FIFA Forward Enterprise (FFE) adlı yeni kommersiya strukturu yaratmağı planlaşdırdığı məlum olub.
Sonradan FIFA prezidenti Canni İnfantino futbol konfederasiyalarının tənqidi və UEFA-ya üzv ölkələrin dünya çempionatını boykot etmək təhlükəsi fonunda bu ideyadan imtina edib. Bundan sonra bəzi Avropa futbol federasiyaları 2027-ci ilin martında keçiriləcək FIFA prezidenti seçkilərində İnfantinonun namizədliyinə dəstəklərini geri çəkiblər.
