Idman.biz
"Kəpəz" Gəncə stadionunda "Sabah"ı qəbul etmək üçün səbirsizlənir".
Bunu qərb təmsilçisinin kapitanı Əli Səmədov deyib.
Yarımmüdafiəçi Azərbaycan Premyer Liqasında 2026/2027 mövsümünə ciddi hazırlaşdıqlarını bildirib.
"Gündə 2 dəfə olmaqla məşqlərimizi davam etdiririk. Bildiyiniz kimi, son yoxlama matçımızı da "Karvan-Yevlax"a qarşı keçirdik. Yorğun olmağımıza baxmayaraq yaxşı görüş oldu. Yeni və doğma stadionda ilk matça çıxmaq bizi çox həyəcanlandırdı. Azarkeşlərin dəstəyini həmin an hiss edə bildik. İnanırıq ki, yeni mövsümdə bütün oyunlarda stadion dolacaq və azarkeşlərlə əl-ələ verərək qələbələr qazanacağıq. Artıq "Sabah"la matçın hazırlıqlarına start vermişdik. Komandamız rəqibini Gəncə stadionunda qəbul etmək üçün səbirsizlənir", - o report.az-a açıqlamasında deyib.
Qeyd edək ki, Azərbaycan Premyer Liqasında yeni mövsümə avqustun 14-də start veriləcək. "Kəpəz" I turda "Sabah"la üz-üzə gələcək.
