Idman.biz
Futbol üzrə İtaliya A Seriyasının 38-ci - son turunda mövsümün əsas suallarından bəzilərinə cavab tapılıb.
İdman.Biz xəbər verir ki, "Roma" səfərdə "Verona"nı 2:0 hesabı ilə məğlub edərək Çempionlar Liqasına vəsiqə qazanıb. Rim təmsilçisi üçün qələbə vacib idi və komanda ikinci hissədə rəqibin azlıqda qalmasından istifadə edib.
"Verona"nın futbolçusu Nikolas Valentini 50-ci dəqiqədə qırmızı vərəqə alıb. Bundan altı dəqiqə sonra Paulo Dibalanın ötürməsindən sonra Donyell Malen hesabı açıb. Əlavə olunmuş vaxtda Stefan El-Şaaravi yekun hesabı müəyyənləşdirib - 2:0. "Roma" mövsümü 73 xalla üçüncü pillədə başa vurub. "Verona" isə 21 xalla 19-cu olub.
Son turda "Milan" doğma meydanda "Kalyari"yə 1:2 hesabı ilə uduzub. "Rossoneri" ikinci dəqiqədə önə keçib. Santyaqo Ximenesin ötürməsindən sonra Aleksis Salemakers fərqlənib. Qonaqlar qısa müddət sonra Cennaro Borrellinin qolu ilə hesabı bərabərləşdiriblər. 57-ci dəqiqədə Xuan Rodriqes "Kalyari"nin ikinci qolunu vurub.
Massimiliano Alleqrinin komandası məğlubiyyətdən qaça bilməyib. "Milan" mövsümü 70 xalla altıncı pillədə tamamlayıb. "Kalyari" isə 43 xalla 14-cü yeri tutub.
Aşağı liqaya düşmə mübarizəsində də yekun qərar verilib. "Kremoneze" elitada qalmaq üçün "Komo" ilə oyunda müsbət nəticə qazanmalı və "Leççe"nin xal itirməsinə ümid etməli idi. Lakin komanda "Komo"ya 1:4 hesabı ilə məğlub olub.
Bununla belə, "Kremoneze" qələbə qazansaydı belə, elitada qala bilməyəcəkdi. Çünki "Leççe" öz meydanında "Cenoa"nı 1:0 hesabı ilə məğlub edib. "Leççe" 38 xal toplayaraq mövsümü 17-ci yerdə bitirib və Seriya A-da qalıb.
A Seriyasından B Seriyasına düşən komandalar "Kremoneze", "Verona" və "Piza" olub.
Turnir cədvəlinin ilk yeddi pilləsində qərarlaşan komandalar üçün də avroliqalarla bağlı vəziyyət aydındır. "İnter", "Napoli", "Roma" və "Komo" UEFA Çempionlar Liqasının qrup mərhələsinə vəsiqə qazanıblar. "Yuventus" və "Milan" isə Avropa Liqasının qrup mərhələsində mübarizə aparmalı olacaqlar. "Atalanta" Konfrans Liqasının seçmə mərhələsində qüvvəsini sınayacaq.
22:11
İtaliyanın "Napoli" futbol komandası Seriya A-nın 38-ci turunda "Udineze"yə 1:0 hesabı ilə qalib gəlib.
İdman.Biz xəbər verir ki, qarşılaşma Neapoldakı "Dieqo Armando Maradona" stadionunda keçirilib. Görüşdə yeganə qol 24-cü dəqiqədə vurulub. Kevin de Bröynenin ötürməsindən sonra Rasmus Hoylund fərqlənib.
"Udineze" ikinci hissədə azlıqda qalıb. Kristian Kabasel 62-ci dəqiqədə sarı vərəqə alıb, 64-cü dəqiqədə isə meydandan qovulub.
Say üstünlüyünə baxmayaraq, "Napoli" hesabı artıra bilməyib və matç 1:0 hesabı ilə başa çatıb.
Bu qələbədən sonra Antonio Kontenin komandası mövsümü 38 oyuna 76 xalla ikinci pillədə tamamlayıb. Neapol təmsilçisi Seriya A-da gümüş mükafatçı olub. "Udineze" isə 50 xalla 10-cu yeri tutub.
19:06
İtaliyanın "Parma" futbol komandası A Seriyasının 38-ci turunda "Sassuolo" ilə qarşılaşıb.
İdman.Biz xəbər verir ki, meydan sahibləri oyundan 1:0 hesablı qələbə ilə ayrılıblar.
Görüşün birinci hissəsi gərgin mübarizə şəraitində keçib. Baş hakim yeddinci dəqiqədən 30-cu dəqiqəyə qədər futbolçulara dörd sarı vərəqə göstərib. Buna baxmayaraq, fasiləyədək hesab açılmayıb.
Matçın taleyi 80-ci dəqiqədə həll olunub. Pontus Almkvist məhsuldar ötürmə ilə yadda qalıb, Mateo Pelleqrino isə topu qapıdan keçirərək "Parma"ya qələbə qazandırıb.
Bu nəticədən sonra "Parma" xallarının sayını 45-ə çatdırıb və A Seriyasında 12-ci pilləyə yüksəlib. "Sassuolo" isə 49 xalla 11-ci sırada qərarlaşıb.
