Sport24.az
Türkiyənin "Bandırmaspor" klubu azərbaycanlı futbolçu Coşqun Diniyevə olan borcunu ödəyib. Sport24.az xəbər verir ki, bu, klubun FIFA tərəfindən tətbiq olunan transfer qadağasının aradan qaldırılmasından sonra məlum olub.
FIFA-nın Futbol Tribunalı bu il fevralın 3-də çıxardığı qərarla "Bandırmaspor"u Coşqun Diniyevə 25 min avro ödəməyə məcbur etmişdi.
Klub qərarı vaxtında icra etmədiyi üçün FIFA tərəfindən transfer qadağası ilə cəzalandırılmışdı.
Hazırda isə "Bandırmaspor" FIFA-nın transfer qadağası tətbiq olunan klublar siyahısında yer almır. Bundan əlavə, Türkiyə təmsilçisi yay "transfer pəncərəsi"ndə yeni futbolçular heyətinə qatıb.
Bu isə "Bandırmaspor"un Coşqun Diniyev işi üzrə FIFA-nın qərarını icra etdiyini və transfer qadağasının aradan qaldırıldığını göstərir.
Qeyd edək ki, ki, FIFA-nın bu il fevralın 3-də verdiyi qərara əsasən, Türkiyə təmsilçisi Coşqun Diniyevə 25 min avro borclu çıxıb. Mübahisə tərəflər arasında 10 fevral 2025-ci ildə imzalanmış qarşılıqlı xitam sazişindən qaynaqlanıb. Həmin sənədə əsasən, "Bandırmaspor" yarımmüdafiəçiyə 25 min avro kompensasiya ödəməyi öhdəsinə götürsə də, müəyyən edilmiş müddətdə bunu etməyib.
Diniyev əvvəlcə kluba rəsmi xəbərdarlıq göndərərək borcun ödənilməsini tələb edib. Nəticə əldə olunmadığından məsələ FIFA-ya daşınmışdı.
