Sport24.az
Azərbaycan millisinin baş məşqçisi Ayxan Abbasov UEFA Millətlər Liqasında sabah Lixtenşteynə qarşı keçirəcəkləri oyundan əvvəl təşkil olunan mətbuat konfransında iştirak etdi. Sport24.az xəbər verir ki, əvvəlcə fikirlərini bölüşdü:
– Turnir cədvəlində birinci sırada olmaq istəyiriksə, qələbə qazanmalıyıq. Lixtenşteynin oyunlarını izləmişik. İtirəcəkləri bir şey yoxdur. Müdafiədə sıx kompakt oynayan komandadır. Qələbə qazanmaq istəyirik. Oyunumuzu düzgün qurmasaq, tələssək, çətin ola bilər. İnanıram ki, sabah meydandan qələbə ilə ayrılacağıq.
– Heyətlə bağlı problem varmı?
– Litva ilə matçdan sonra xırda zədələr çox oldu. Ümid edirəm ki, bugünkü son məşqdə hamısı yerində olacaq. Renat Dadaşov sabahkı matçda meydana çıxmayacaq, Litva ilə görüşdə də iştirakı sual altındadır. Digər xırda zədəlilərimiz var, amma çox ciddi deyil. Hər kəs oynamaq istəyir.
– Komandanın oyununda nəyi dəyişmək istəyirsiniz?
– Rəqibləri təhlil edib, buna uyğun hazırlaşırıq. Litva və Lixtenşteyn fərqli komandadır, fərqli futbol oynayır. Lixtenşteynlə matçda müdafiəni yarmaq vacib olacaq. Burada ustalıq keyfiyyəti önə çıxmalıdır. Üç məşqdir, çalışırıq. İnanırıq ki, istədiyimiz qolları vura biləcəyik. Eyni zamanda, qapımızı da toxunulmaz saxlamalıyıq.
– Artıq dünyada zəif komanda anlayışı yoxdur. Gözlənilməz vəziyyətə hazırsınız?
– Doğrudur, zəif rəqib yoxdur. Bütün komandalar xal qazana, böyük kollektivlərlə mübarizə apara bilirlər. Hazırlıq dövründə də bunu qeyd etmişdik. Çox hücum etməli, dominant oynamalıyıq. Fransa, Ukrayna və İslandiyaya qarşı bunu edə bilməmişdik. Bugünkü situasiya da nəyi tələb edirsə, onu etməliyik.
– Millinin Tofiq Bəhramov adına Respublika stadionunda oynaması nostalji hisslər yaradır. Sabah daha çox fanatın olacağını düşünürsünüz?
– Ümid edirəm… Millimizin azarkeş dəstəyinə ehtiyac var. Futbolçularla danışanda da bunu bildiririk. Litvada rəqibə yaxşı dəstək var idi. Ümumiyyətlə, azarkeş problemi çempionatımızda da var. Təkcə avrokuboklarda daha çox fanat olur. Ümid edirəm ki, sabah milliyə dəstək olacaq. Bu arenada çıxış etməyi futbolçular da çox sevir.
– Zamiq Əliyev milliyə çağırılmamasına münasibət bildirib, diqqətdən kənarda qaldığını deyib.
– Hər futbolçu yığmada oynamaq istəyir. Zamiq yəqin xəbərsizdir, amma onun bütün oyunlarını izləmişik. Elə futbolçu deyərəm ki, bəlkə də, sizin yadınızdan çıxıb. Biz necə seçim edirik? Bu gün Zamiqin mövqeyində Anton, Rəhman, Murad var. Biz onlara üstünlük vermişik. Bu, o demək deyil ki, onu bəyənmirik. Sabah ona da dəvət göndərə bilərik. Əvvəlki toplanışlarımızda da olub. Kim daha yaxşıdırsa, o oynayır. Zamiq indiki məqamda mövqeyində digər futbolçulardan geri qalır. Yanaşmamız belədir, onunla şəxsi problemimiz yoxdur.
