Idman.biz
Fransada keçirilmiş güllə atıcılığı üzrə Avropa çempionatında Azərbaycan snayperləri Niyaz Ağazadə və Regina Meftahətdinova qarışıq komandalar arasında skitdə bürünc mükafatçı olublar. Ümumilikdə isə azərbaycanlı atıcılar yarışda üç medal qazanıblar.
Bu, tanınmış azərbaycanlı idmançı, Sidney-2000 Olimpiya çempionu və 2004 Olimpiya Oyunlarının bürünc medalçısı, Zemfira Meftahətdinovanın qızı Regina Meftahətdinovanın Avropa çempionatlarında ilk medalıdır. Qeyd edək ki, hazırda Zemfira Meftahətdinova Azərbaycan Milli Olimpiya Komitəsinin vitse-prezidentidir.
İdman.biz-lə söhbətində görkəmli idmançı qızının qitə çempionatındakı uğurunu necə qarşılamasından danışıb.
- Qızınızın Avropa çempionatındakı çıxışını izlədinizmi?
- Əlbəttə, televiziyada izlədik. Çox həyəcan keçirdik. Ümumiyyətlə, idmançıya azarkeşlik etmək asan deyil, özü də bu halda söhbət təkcə idmançı yox, doğma qızından gedir.
- Bu onun Avropa çempionatındakı ilk medalındır...
- Həqiqətən, bu səviyyədə onun ilk medalındır. Regina daha əvvəl də Niyaz Ağazadə ilə birlikdə fəxri kürsüyə çox yaxın olublar, amma hər dəfə bəxtləri gətirmirdi. Bu dəfə, Tanrıya şükür, hər şey alındı. Regina həmçinin 2024-cü ilin Paris Olimpiya Oyunlarına lisenziya qazanmağa yaxın idi. Bizim əla uşaqlarımız var, hamısı çox çalışır və mən əminəm ki, gələcəkdə böyük uğurlar əldə edəcəklər.
- Qızınızın Avropa çempionatında mükafatçı olduğunu gördüyünüz zaman nə hiss etdiniz?
- (gülür) Bu, analıq duyğularıdır. Təbii ki, sevinc. Valideynlər həmişə uşaqları uğur qazandıqda xoşbəxt olurlar. Uşaqlarının çıxışlarını izləmək çox çətindir. Regina məşqçisi Emil Cəfərovun da necə çətin vəziyyətdə olduğunu təsəvvür edirəm.
Tanrı uşaqlarımızı uğurlu etsin. Mən yalnız qızıma deyil, bütün Azərbaycan idmançılarına azarkeşlik edirəm. Ümid edirəm ki, idmanımız inkişaf edəcək və uğurlar əldə edəcək. Atıcılıqçılarımızın beynəlxalq arenada qələbələrini davam etdirəcəklərinə inanıram - necə ki, bunu artıq Fransada göstəriblər.
- Necə düşünürsünüz, Regina gələcəkdə nəinki sizin yolunuzu təkrarlayacaq, həm də nailiyyətlərinizi keçə biləcəkmi?
- İdmanda hər şey mümkündür. Uşaqlar çox çalışırlar, Avropa çempionatındakı nəticə bunun sübutudur. Perspektivlərə gəlincə, zaman göstərəcək. Hamımız ümumi iş üçün çalışırıq. Əminəm ki, hər şey yaxşı olacaq. Federasiya lazım olan bütün şərait yaradır, idmançılar isə maksimum səylə çalışırlar.
- Yeni Olimpiya dövrü artıq başlayıb. Azərbaycan idmanı üçün bu dövrün başlanğıcını necə qiymətləndirirsiniz?
- İlk yarımilin yekunlarına baxsaq, uğurlu olduğunu deyə bilərik. Hələ il başa çatmayıb və əminəm ki, ilin ikinci yarısında idmançılarımız daha yaxşı çıxış edəcəklər.
Ümid edək ki, hər şey yaxşı olacaq. Mən məşqçi deyiləm, amma həmişə məsləhət verməyə və təcrübə paylaşmağa hazıram. Yarışlarda isə hər şey idmançıların özündən asılıdır. Heç kim onların yerinə bir şey edə bilməz - hər kəs öz xoşbəxtliyini özü qurur (gülür).
İdman.biz
