Idman.biz
Azərbaycanlı futbolçu Vüsal İsgəndərli "Malişeva"nın Kosovo çempionatında keçirdiyi növbəti oyunda iştirak edib.
İdman.Biz xəbər verir ki, Superliqanın 12-ci turu çərçivəsində həmyerlimizin komandası öz meydanında "Feronikeli-74" ilə 0:0 hesablı heç-heçə edib.
İsgəndərli meydan sahiblərinin start heyətində meydana çıxıb. Lakin "Malişeva" fərqlənmək üçün bir neçə imkanı olmasına baxmayaraq, rəqib qapısına yol tapa bilməyib.
Qarşılaşmanın əsas epizodlarından biri 35-ci dəqiqədə yerinə yetirilən və qola çevrilməyən penalti olub. Cemail İbişi qonaqların qapıçısı Aqron Kolayı məğlub edə bilməyib. Qolkiper 11 metrlik zərbəni dəf edib.
Bundan əlavə, meydan sahiblərinin daha bir qolu VAR-ın müdaxiləsindən sonra ləğv edilib.
İki xal itirməsinə baxmayaraq, "Malişeva" Kosovo çempionatının turnir cədvəlində birinci pillədəki mövqeyini qoruyub. 12 oyundan sonra komandanın aktivində 27 xal var. Ən yaxın izləyicisi "Priştina" isə ehtiyatda bir oyunu olmaqla 26 xal toplayıb.
