Futbol üzrə Azərbaycan İkinci Liqasında bu gün, noyabrın 22-də 12-ci turun oyunlarına start veriləcək. İlk oyun günündə üç qarşılaşma baş tutacaq.
İdman.Biz xəbər verir ki, turun açılış matçında "Şəki" və "Kür-Araz" üz-üzə gələcəklər. Görüş saat 13:00-da Zaqatala Olimpiya İdman Kompleksinin stadionunda başlayacaq.
Bu qarşılaşma turnir cədvəlinin son iki pilləsində qərarlaşan komandalar üçün xüsusi əhəmiyyət daşıyır. "Kür-Araz" 11 oyundan topladığı beş xalla 10-cu, "Şəki" isə üç xalla 12-ci sıradadır. Meydan sahibləri qalib gələcəkləri təqdirdə rəqibini geridə qoymaq imkanı əldə edəcəklər.
Saat 14:30-da daha iki oyun keçiriləcək. "Ağstafa Gəncləri" doğma meydanda "Hypers"i qəbul edəcək. Ağstafa təmsilçisi 11 matçdan sonra 21 xalla beşinci pillədə yer alır. Dörd qələbə, üç heç-heçə və dörd məğlubiyyəti olan "Hypers" isə 15 xalla yeddincidir.
Günün mərkəzi qarşılaşması Şirvanda təşkil olunacaq. Çempionatın lideri "Qaradağ Lökbatan" üçüncü pillədə qərarlaşan "Şirvan"ın qonağı olacaq.
Lökbatan təmsilçisi keçirdiyi 11 oyunun 10-da qalib gələrək 30 xal toplayıb. Cəmi bir dəfə məğlub olan lider rəqib qapılarından 45 top keçirib və öz qapısında doqquz qol görüb.
"Şirvan" isə səkkiz qələbə, bir heç-heçə və iki məğlubiyyətlə 25 xal toplayıb. Meydan sahibləri qalib gələcəkləri təqdirdə liderlə xal fərqini ikiyə endirəcəklər.
Turun qalan iki oyunu noyabrın 23-də baş tutacaq. "Şəmkir" "Ağdaş"la, "Difai" isə "Marafon"la qarşılaşacaq. "Zəngəzur"un UEFA Region Kubokunda iştirakı səbəbindən "Dinamo" ilə görüşü təxirə salınıb.