Qoca “qartallar” - TƏQDİMAT

Bu yay bütün Avropanın diqqəti Almaniyaya yönələcək. Qitənin 24 ən güclü millisi sayca 17-ci Avropa çempionatında mübarizə aparacaq. İyunun 14-dən iyulun 14-dək davam edəcək yarışın startına 22 gün qalıb.

İdman.biz AVRO-2024-ün iştirakçılarının təqdimatını davam etdirir.

Bu həftə C qrupunun komandalarını nəzərdən keçiririk. İngiltərə millisinin favorit olduğu qrupda Danimarka və Sloveniyanın ikincilik mübarizəsindəki digər rəqibi Serbiyadır.

İkinci yerlə Almaniyaya
Draqan Stoykoviçin baş məşqçisi olduğu komanda AVRO-2024-ə vəsiqəni çətinliklə qazanıb. Serbiya millisi son turda istəyinə çatıb. "Qartallar" Macarıstan və Monteneqro ilə mübarizədə ikinci olmağı bacarıb. Sonuncuları da, Litvanı da iki dəfə məğlub edən Stoukoviçin komandası digər görüşlərdəki itkilər üzündən özünü çətin duruma salıb. Macarıstana iki dəfə uduzan Serbiya qrupun autsayderi Bolqarıstanla iki heç-heçə edib. Son turdakı matç komandanı AVRO-2024-dən məhrum da edə bilərdi. Srcan Babiçin 82-ci dəqiqədəki qolu və eyni zamanda Monteneqronun Macarıstana uduzması "qartallar"ı ikinci edib.

Tarixdə ilk
Serbiya millisi bir vaxtların nüfuzlu Yuqoslaviya millisinin varisi sayılır. Dünya və Avropa çempionatlarında dəfələrlə yarımfinal və 1/4 finala çıxan federasiyanın süqutundan sonra "qartallar"ın əzəmətindən əsər-əlamət qalmayıb. Serbiya kimi ilk dəfə qitə çempionatında oynamaq hüququ qazanan yığmanın son belə uğuru 2000-ci ilə təsadüf edib. Həmin vaxt Serbiya ilə Monteneqronun daxil olduğu Yuqoslaviya 1/4 finala qədər irəliləyib. Serbiya son dörd mundialın üçündə final mərhələsində iştirak etsə də, qrupdan çıxmayıb.

Veteranların ümidində
Serbiya millisi final mərhələsinin ən yaşlı komandalarından biri olacaq. Yığmada aparıcı rollarda əsasən veteranlardır. Ulduz sayıla biləcək gənclər isə yetərincə azdır. Bu üzdən Serbiya qrupun autsayderi gözü ilə də baxanlar az deyil. Serbiya yığmaları bütün komanda növlərində kifayət qədər güclü təsir bağışlasa da, Stoykoviçli komandanın 1/8 finala adlaması asan olmayacaq.

Serbiya millisinin qrupdakı oyunları:
16 iyun. Serbiya – İngiltərə
20 iyun. Sloveniya - Serbiya
25 iyun. Danimarka – Serbiya

Qeyd edək ki, C qrupunun görüşləri 5 fərqli şəhərdə - Münhen, Köln, Frankfurt, Helzenkirhen və Ştutqartda keçiriləcək.

Vüqar Xeyrullayev
İdman.biz