Idman.biz
Əfsanəvi fransalı biatlonçusu Juliya Simon oğurluq və dələduzluqda təqsirli bilinib. Onun məhkəmədə sübut ediləndən daha çox cinayət törətdiyi ehtimal olunur.
İdman.Biz Sport.de-yə istinadla xəbər verir ki, bu barədə işə baxan prokuror Fransa mətbuatına açıqlama verib.
Prokurorun sözlərinə görə, əvvəlcə yalnız Jastin Breza-Buşe və Fransa biatlon yığmasının daha iki üzvü Simonu ittiham etsələr də, araşdırma zamanı komandanın digər idmançılarının da ondan şübhələndiyi məlum olub.
Prokuror Anais və Hloyi Şevalye bacılarının, eləcə də Karolin Kolombo və Lu Janmonnonun adlarını çəkib. Onlar bəzi şəxsi əşyalarının, o cümlədən 50 avroluq əskinasın itməsi barədə məlumat veriblər. Kolombo da pulunun oğurlandığını iddia edib, Janmonno isə Simonla eyni otel otağında qaldığı vaxt şəxsi əşyalarının yoxa çıxdığını bildirib.
Bununla belə, bu ifadələr cümə günü keçirilən məhkəmə iclasında əsas sübut kimi qəbul edilməyib, çünki dörd idmançının heç biri rəsmi şikayət verməyib.
İstintaq nəticəsində müəyyən olunub ki, Juliya Simon oğurlanmış kredit kartlarından istifadə edərək təxminən 3 min avroluq alış-veriş edib.
Fransa qanunlarına əsasən, bu cür cinayətlər üçün beş ilədək həbs və 375 min avro cərimə nəzərdə tutulur. Lakin məhkəmə Simonu üç ay şərti həbsə və 20 min avro cəriməyə məhkum edib.
