Idman.biz
İtaliyanın bodibildinq camiəsi ağır itki ilə üzləşib. Keçmiş bodibildinq çempionu Andrea Lorini 48 yaşında vəfat edib.
İdman.Biz xəbər verir ki, Lorini Çiari şəhərindəki evində ölü halda tapılıb. Onu yataqda huşsuz vəziyyətdə anası Nadia aşkar edib.
Yaxınlarının bildirdiyinə əsasən, ölümün səbəbi qəfil xəstəlik nəticəsində baş verən ürək dayanması olub.
Pandemiyadan əvvəl Lorini İtaliyanın ən güclü bodibilderləri sırasında yer alıb və 2017 və 2019-cu illərdə IFBB xətti ilə keçirilən çempionatda 90 kq çəki dərəcəsində üçüncü yeri tutub. Güclü fiziki quruluşu və ağır atletikaya sadiqliyi ona doğma şəhərində "Nəhəng" ləqəbini qazandırıb.
Qeyd edək ki, bu hadisə bodibildinq dünyasında son vaxtlar qeydə alınan ikinci faciəvi ölüm kimi diqqət çəkir. Daha əvvəl Braziliyada "Real-life Popeye" ləqəbi ilə tanınan bodibilder Arlindo de Souza 55 yaşında vəfat etmişdi. Onun ölümünə böyrək çatışmazlığı səbəb olub. De Souzanın ekstremal əzələ quruluşunu sintol adlanan yağ qarışıqlarını özünə yeritməsi nəticəsində əldə etdiyi bildirilirdi.
