Çinli dünya çempionu Bakıda növbəti titulunu qazanıb

Bakıda keçirilən atıcılıq üzrə Dünya kuboku davam edir.

İdman.biz xəbər verir ki, bu gün kişilər və qadınlar arasında 10 metr məsafəyə pnevmatik tapançadan atəş açma növündə final yarışları keçirilib.

Qızıl medalı Çini təmsil edən Yu Xie qazanıb. Ötən il Bakıda keçirilən mundialda dünya çempionu adını qazanan asiyalı atlet həlledici mərhələdə Almaniyadan olan Robin Valteri üstələyib.

Həmçinin bürünc medal da onun komanda yoldaşına nəsib olub. 3 qat dünya çempionu Boven Zhang bu dəfə "bürünc"lə kifayətlənib.

Eyni növdə qadınların mübarizəsində fransalı Kamille Yedrjeyesvki sürpriz nəticəyə imza atıb. 22 yaşlı atıcı Çin və Koreyadan olan güclü rəqiblərini üstələyərək qızıl medala yiyələnib. Koreyalı Yeji Kim gümüş, Çindən olan Ranxin Jianq bürünc medalla kifayətlənib.

Medalların təqdim olunması mərasimində gənclər və idman naziri Fərid Qayıbov da iştirak edib.

Qızıl medal qazanaraq göz yaşlarını saxlaya bilməyən Yedrjeyevski bildirib ki, təsnifat mərhələsi kifayət qədər gərgin keçib: "Final mərhələsinin bir gün sonraya təsadüf etməsi yaxşı oldu. Belə olan halda, dincəlmək və həlledici mərhələyə köklənmək üçün vaxt qazandım. Fəxri kürsüyə qalxdığıma görə məşqçimə təşəkkür edirəm. Bəli, "qızıl" qazandığımı biləndən sonra təsirləndim və göz yaşlarımı saxlaya bilmədim. Həmin an özümlə fəxr etdim və hislərə qapıldım. Hər gün qızıl medal qazanmırıq deyə, belə anlar bəzən adamı təsirləndirir.

Fransalı atıcı paytaxtımızın onun üçün düşərli olduğunu deyərək, gördüklərindən məmnunluğunu dilə gətirib: "Bu, Bakıda ilk qızıl medalımdır. 2022-ci ildə burada keçirilən Dünya kubokunda gümüş medal qazanmışdım. Bakı Atıcılıq Mərkəzini ümumilikdə yaxşı tanıyıram. Bəlkə də uğur qazanmağımda bu amilin də rolu var. Çünki hər mənada özümü rahat hiss edirəm. Paytaxtınızla bağlı xoş xatirələrim var. Komandamızla birlikdə şəhəri gəzmək imkanımız oldu. Mərkəzdə dolaşdıq, dəniz kənarında gəzdik. Burada olmaqdan zövq aldığımızı deməliyəm".

İdman.biz