Idman.biz
Çilidə keçirilən velotrek üzrə dünya çempionatı zamanı qəribə hadisə baş verib.
İdman.Biz xəbər verir ki, rusiyalı velosipedçi Valeriya Valqonenin qaldığı otelin otağında tavan çökərək onun üstünə düşüb.
Bu barədə Çempionlar Liqasının qalibi Alina Lısenko sosial şəbəkədə paylaşım edib. O, bildirib ki, xoşbəxtlikdən Valqonen xəsarət almayıb:
"Səhərimiz Valeriyanın üstünə tavan düşməsi ilə başladı (gülür). Hər şey qaydasındadır, baş yerindədir. Bizi daha geniş üçnəfərlik otağa köçürdülər. Bunun müsbət tərəfi varmı? Əlbəttə ki, yox, çünki Valeriyanın başı üçün hələ də narahatam".
Valqonen öz növbəsində paylaşıma zarafatla münasibət bildirib: "Əlbəttə, müsbət tərəfi də var - indi başsız da yarışa bilərəm (gülür)".
Qeyd edək ki, bu gün start götürən dünya çempionatı oktyabrın 26-dək Çilinin paytaxtı Santyaqoda keçirilir. Turnirdə ümumilikdə 22 medal dəsti (11 kişi, 11 qadın) sahibini tapacaq.
