Idman.biz
Azərbaycanda fiqurlu konkisürməyə maraq getdikcə artır. Bu idman növünü hələlik geniş yayılmış hesab etmək mümkün olmasa da, ona maraq göstərənlərin sayı ildən-ilə çoxalır. Qış aylarında buz arenasına daxil olmaq üçün yaranan uzun növbələr də bunu açıq şəkildə təsdiqləyir.
Bəs fiqurlu konkisürməyə yalnız mövsümi maraq göstərməyən, onu ciddi məşğuliyyətə, hətta gələcək peşəyə çevirənlər kimlərdir?
İdman.Biz gənc idmançıların məşqində iştirak edib və onlardan bəziləri ilə söhbət edib.
Ən balaca fiqurlu konkisürən
Müxtəlif yaş qruplarından olan gənc fiqurlu konkisürənlər arenanın buzunda inamla hərəkət edirlər. Lakin onlardan birinə məşqçi xüsusi diqqət ayırır. Səbəb isə onun qrupun ən balaca üzvü — beş yaşlı Safiyya Köçərlinin olmasıdır.
Qızın anası Lalə Köçərlinın sözlərinə görə, Safiyyə fiqurlu konkisürmə ilə məşğul olmağı özü istəyib. Ailə Moskvada yaşadığı dövrdə o, ilk dəfə buz meydançasına gedib və bundan sonra hər gün yenidən ora getməyi xahiş edib. Azərbaycana köçdükdən sonra Safiyyanı əvvəlcə gimnastikaya yazdırıblar. Lakin ölkədə fiqurlu konkisürmənin olduğunu öyrənən qız buz meydançasına getməyə başlayıb.
Lalə Köçərli qeyd edir ki, ətraflarında bir çoxları bu idman növünün seçilməsinə təəccüblənir:
"Azərbaycanlılar üçün bu, hələ də bir qədər ekzotik istiqamətdir. Amma ümid edirəm ki, gələcəkdə daha fəal şəkildə inkişaf etdiriləcək".
Köçərli balaca qızını buza buraxmaqdan qorxmadığını da bildirib:
"Uşaq məşqçi ilə olanda insan daha rahat olur. Soyuq isə əksinə, immuniteti möhkəmləndirir — uşaqlar daha az xəstələnirlər. Düzdür, nənələr həmişə narahat olur".
Bununla belə, Lalə Köçərli Safiyyanin fiqurlu konkisürmə ilə peşəkar səviyyədə məşğul olmasını istəmədiyini gizlətmir:
"Böyük idman həm təhsilə, həm də sağlamlığa təsir edir. Bir məqamda seçim etmək lazım gələcək. Amma həyat yoldaşım onun peşəkar fiqurlu konkisürən olmasını istəyir".
Safiyyanın özü isə deyir ki, fiqurlu konkisürməni çox sevir və fiqurlu konkisürən olmağı arzulayır. Artıq nələri bacardığı ilə bağlı suala qızcığaz belə cavab verir:
"Tullanmağı! Amma daha yaxşı tullanmağı öyrənmək istəyirəm".
Buz meydançasının digər ulduzları
Doqquz yaşlı Emiliya Əliyeva da İdman.Biz-lə öz hekayəsini bölüşüb:
"Mən artıq dörd ildir ki, konkisürürəm. Valideynlərim məni məşqlərə gətirmişdilər, sonra isə özümə də maraqlı gəldi".
Qız fiqurlu konkisürmə ilə peşəkar şəkildə məşğul olmaq istəyir və gələcəkdə böyük buz meydançası açaraq məşqçi olmağı arzulayır. Emiliya artıq fırlanmalar, eləcə də rittberger, salkhov və flip kimi tullanmaları yerinə yetirə bilir. Hazırda o, dubl akseli (fiqurlu konkisürmədə ən çətin tullanmalarından biri) öyrənir və istənilən üçqat tullanmanı icra etməyi xəyal edir.
Gənc idmançının sözlərinə görə, valideynləri onun idman karyerasında fəal iştirak edirlər. Anası məşqçi olmasa da, əlavə olaraq onunla məşğul olur:
"O, fiqurlu konkisürməni çox yaxşı anlayır", – deyə Emiliya qeyd edir.
"Valideynlərim məni dəstəkləyirlər. Anam da mənimlə məşğul olur, bəzən danlayır, amma nəticə getdikcə daha yaxşı olur. Məktəbdə müəlliməm də məni dəstəkləyir, amma sinif yoldaşlarım nadir hallarda çıxışlarıma gəlirlər".
Emiliya proqramlarına yaradıcı yanaşmağı sevdiyini də vurğulayıb:
"Bu skandinav üslublu kostyumu çıxışım üçün atamla birlikdə xüsusi olaraq fikirləşmişik, anam da kömək edib. Əvvəllər yavaş proqramım var idi, indi isə mənə daha ritmik yeni proqram qoyublar".
Daha bir istedadlı gənc fiqurlu konkisürən Varvara Aleksandrova isə bu idman növü ilə dörd yaşından məşğul olduğunu bildirib:
"İlk dəfə buzun üzərinə çıxanda qorxulu və həyəcanlı idi. Amma artıq bir həftədən sonra öyrəşdim. İndi isə yıxılmaqdan belə qorxmuram".
Varvaraya fiqurlu konkisürənlər Kamila Valiyeva və Aleksandra Trusova ilham verir. Onun sevimli elementi rittbergerdir, lakin o da dubl akseli yerinə yetirməyi arzulayır. Gələcəkdə qız idman ustası, daha sonra isə məşqçi olmaq istəyir.
Məqsədinə çatmaq üçün Varvara çox məşq etdiyini deyir:
"Mən həftədə altı gün məşq edirəm, dərslərdən sonra birbaşa məşqə gəlirəm. Məktəbdə də yaxşı oxuyuram".
Həm Emiliya Əliyeva, həm də Varvara Aleksandrova fiqurlu konkisürməni onun yaradıcı tərəfinə görə sevdiklərini etiraf ediblər.
"Bu, çox gözəl idman növüdür: musiqi, tullanmalar, fırlanmalar…", – deyə Varvara bildirib.
"Fiqurlu konkisürənlər bir növ akrobatdırlar. Açığı, sadəcə gimnastika ilə məşğul olmaq mənim üçün darıxdırıcıdır. Amma buzun üzərində olanda böyük zövq alırsan", – deyə Emiliya Əliyeva əlavə edib.
FOTO - İslam Atakişiyev
