Idman.biz
ABŞ-də yaşayan azərbaycanlı Nazim Şəfi dünyanın ən böyük həvəskar bodibildinq federasiyası – "National Physique Committee"nin (NPC) təşkil etdiyi iki nüfuzlu turnirdə uğurla çıxış edib.
İdman.Biz xəbər verir ki, Nazim təhsil illərində ailəsi ilə birlikdə İngiltərəyə köçüb, uzun müddət BBC-nin Rus xidmətində prodüser kimi çalışıb. 2020-ci ildə ABŞ-yə köçən Nazim hazırda orada Milli İdman və Tibb Akademiyasında təhsil alır.
İdmançının ilk böyük uğuru NPC "New York State Grand Prix 2025" yarışında olub. O, "Masters 40+" kateqoriyasında qızıl, "Masters 35+"da isə gümüş medal qazanıb. Ardınca Konnektikut ştatında keçirilən NPC "East Coast Cup 2025" turnirində iştirak edən Nazim hər iki kateqoriyada iki gümüş medal əldə edib.
Nazim Şəfi müsahibəsində bildirib ki, idman zalında məşqə artıq çəkisini azaltmaq üçün başlayıb: "Amma nəticələri gördükcə bu sahəyə ciddi yanaşmağa başladım. Cəmi doqquz ayda özüm üçün böyük dəyişiklik əldə etdim".
Beləliklə, Nazim Şəfi qısa müddətdə ABŞ-də ən perspektivli həvəskar bodibilderlərdən birinə çevrilib.
