Report.az
Ümid edirik ki, Onur Quluzadə Avropa birinciliyində də mükafatçılar sırasında olacaq.
Bunu "Report"a açıqlamasında Azərbaycanın stolüstü tennis millisinin baş məşqçisi Fərhad İsmayılov deyib.
Mütəxəssis Azərbaycan təmsilçisinin Qətərin paytaxtı Dohada keçirilən "WTT Youth Contender Doha 2025" turnirində 15 yaşadək idmançılar arasında gümüş medal qazanması ilə bağlı danışıb:
"Onur dəfələrlə Avropa və dünya seriyalı turnirlərin qalibi və mükafatçısı olub. Bu il ilk dəfə dünya seriyalı turnirə qatıldı. U-15 kateqoriyasında 30-dan çox idmançı mübarizə aparırdı. Qrup mərhələsində iki qələbə ilə növbəti mərhələyə adladı. 1/8, 1/4 və yarımfinalda da inamlı çıxış etdi. Perspektivli tennisçidir. Yalnız finalda İran təmsilçisinə 2:3 hesabı ilə uduzdu".
Baş məşqçi stolüstü tennisçinin finaldakı məğlubiyyətinə də toxunub:
"Finalda 2:0 hesabı ilə öndə idi. Sonuncu setdə də üstün idi. Məncə, bir az psixoloji cəhətdən çatışmazlıq oldu və finalda yenildi. Daha əvvəl də bu rəqibinə məğlubiyyətləri olub. Bu dəfə isə qalibiyyətə yaxın idi. Bu o deməkdir ki, yaxın zamanlarda ona qalib gələcək".
