Idman.biz
"Hər medal mənim üçün çox dəyərlidir. Amma təbii ki, bu il üçün ən dəyərli medal dünya çempionatının bürünc medalı oldu".
Bunu Azərbaycanın cüdo üzrə Avropa, dünya və olimpiya çempionu Zelim Kotsoyev AZƏRTAC-a müsahibəsində deyib.
Həmin müsahibəni təqdim edirik.
- 2025-ci il sizin üçün necə yadda qaldı?
- 2025-ci ilin mənim üçün asan keçmədiyini desəm, daha doğru olar. Amma çox məhsuldar və çətin bir il oldu. Bununla belə, Avropa çempionatı və dünya çempionatında əsas yarışlarda medal qazandığım üçün sevinirəm. Çünki demək olar ki, Olimpiya Oyunlarından sonra ilin çox hissəsini reabilitasiyaya sərf etdim. Olimpiadaya qədər yığılan xırda zədələri sağaldırdım. Ümumilikdə isə il pis keçmədi.
- Bu il hansı yarışda medal uğrunda mübarizə sizin üçün daha çətin keçdi?
- Hər turnir özünəməxsus çətinliklərə malikdir, biz hər biri üçün böyük iş görürük. Amma bu il mənim üçün ən böyük məyusluq İslam Oyunlarının finalı oldu. Döyüşü tam nəzarətdə saxlayırdım, hesabda irəlidə idim, vaza-ari ilə öndə gedirdim, amma son saniyələrdə, demək olar ki, öz səhvim ucbatından boğucu fəndə düşərək məğlub oldum. Bu, ən böyük məyusluq idi. Amma ümumilikdə hər turnirin öz çətinliyi var.
- İslamiada və Avropa çempionatında gümüş, dünya çempionatında bürünc medal qazandınız. Bunlardan hansı mükafat sizin üçün daha dəyərlidir?
- Hər medal mənim üçün çox dəyərlidir. Amma təbii ki, bu il üçün ən dəyərli medal dünya çempionatının bürünc medalı oldu. Bu böyük yarışdır. Bildiyiniz kimi, bir çox cüdoçular Olimpiya Oyunlarından sonra dərhal toparlana bilmirlər və növbəti il yenidən medal qazanmaq onlara çətin olur, çünki Olimpiya ilində emosional yük çox ağır olur. Mən isə çox sevinirəm ki, tam optimal formada olmasam da, uzun reabilitasiya dövründən sonra dünya çempionatında medal qazana bildim. Ona görə deyə bilərəm ki, bu il üçün ən dəyərli medalım dünya çempionatının bürünc medalıdır.
- 2026-cı ildə əsas məqsədinizin Bakıda keçiriləcək dünya çempionatında medal qazanmaq olacağını söyləmişdiniz. Hazırlığınız necə davam edir? Yəqin ki, yanvar ayından intensiv məşqlərə başlayacaqsınız...
- Artıq gələn üçün hazırlıqlara başlamışam. Əsas məqsəd qarşıdan gələn ildə Bakıda keçiriləcək dünya çempionatıdır. Ən vacibi odur ki, artıq zədələrimi sağaltmışam. Hazırda məni narahat edən heç nə yoxdur. Formamı tədricən bərpa edirəm. Hər hansı gözlənilməz hadisə baş verməsə, Bakıda ən yaxşı formada olacağam. Məqsədim dünya çempionatıdır və mən ora hazır olmalıyam.
- Ardıcıl 4 dünya çempionatında fəxri kürsüdə yer almısınız. Yəqin ki, Bakıdakı dünya çempionatında da seriyanı davam etdirmək istəyirsiniz..
- Bəli, dünya çempionatlarından qazandığım dörd medal müəyyən bir sabitlikdən xəbər verir. Amma bilirsiniz, mən nəticə dalınca qaçmıram. Əsasən bu prosesdən zövq alıram. Hər gün yuxudan oyanıb buna sevinirəm. Məşqlər mənə həzz verir, yarışmağı sevirəm, rəqabət hissi hələ də içimdədir və mən uduzmağı heç sevmirəm. Yəqin ki, məhz bu hisslər nəticələrə səbəb olur. Amma özümə xüsusi sabitlik və ya konkret məqsədlər qoymuram. Sadəcə bu işi sevirəm və ondan zövq alıram.
- Qardaşınız Aslan Kotsoyev də 90 kiloqram çəkidə nüfuzlu turnirlərdə iştirak edir və medallar qazanır. Onun sizin uğurlarınızı təkrarlaya biləcəyinizə inanırsınızmı?
- Mən Aslana inanıram, onun məndən daha uğurlu və nəticəli ola biləcəyinə inanıram. Öz tərəfimdən bunun üçün əlimdən gələni edirəm. Federasiya da, məşqçilər də dəstək olur. Amma hər şey ondan asılıdır. Görək, bu işə nə qədər ürəkdən yanaşacaq və nə qədər fanatik olacaq. İnanıram ki, yaxın vaxtlarda o da böyüklərlər arasında yarışlarda özünü göstərəcək.
- Bu il öz çəki dərəcəniz üzrə dünya reytinqində ilk pillədən 3-cü yerə gerilədiniz. Bu geriləmə sizi yeni ildə yenidən zirvəyə qayıtmaq üçün necə motivasiya edir?
- Düzünü desək, reytinq barədə çox da narahat olmuram. Bu il o qədər də çox turnirdə iştirak etməmişəm, o qədər tatamiyə çıxmamışam. Rəqiblərim məndən daha çox yarışıb. Ona görə də, birinci, ya üçüncü olmaq fərq etmir. Əsas olan vacib yarışlarda qalib gəlməkdir. Reytinq bu mərhələdə mənim üçün o qədər də vacib deyil.
