Idman.biz
Səudiyyə Ərəbistanı Olimpiya Komitəsi nəzdində cüdo üzrə performans direktoru vəzifəsində çalışan Azərbaycanın sabiq cüdoçusu Rüstəm Orucov AZƏRTAC-a müsahibə verib.
İdman.Biz həmin müsahibəni təqdim edir:
- Səudiyyə Ərəbistanında işləriniz necə gedir? Yeni ölkədə yeni həyata öyrəşə bilirsinizmi?
- Burada məni çox yaxşı qarşıladılar. Cüdonun inkişafı üçün xidmətlərimdən yararlanmaqda maraq göstərdilər. İsti hava şəraitinə görə uyğunlaşmaq bir qədər çətindir. Amma milli komanda yaratmışıq. İnkişaf üçün çalışırıq.
- Milli komandada potensial görürsünüzmü?
- Bu il yaxşı nəticələr əldə etmişik. Medallar qazanmışıq. Asiya Oyunlarında 2 medal əldə etdik. Bu zamana kimi belə nəticə olmamışdı.
- Müqaviləniz neçə illikdir?
- Hazırda müqaviləm 2032-ci il Olimpiya Oyunlarına kimidir. Amma nə qədər qalacağımı bilmirəm. Həyat göstərəcək. Əsas məqsədim yığma ilə Los-Anceles-2028 Yay Olimpiya Oyunlarında yaxşı çıxış etməkdir.
- Qarşınıza hansı hədəflər qoyulub?
- Olimpiadaya bir lisenziya hədəflənib. Hazırda 60 kiloqramda mübarizə aparan idmançımız var. Onun üzərində işləyirik. Ümid edirik ki, nəticə yaxşı olar.
- Komandanızın Ər-Riyad şəhərində keçirilən VI İslam Həmrəyliyi Oyunlarında nəticəsi barədə nə deyə bilərsiniz?
- Bu yarışlara gənclərdən ibarət yığma ilə qoşulmuşuq. Mən əsasən yeniyetmə və gənclərə fokuslanmışam. Böyüklərdə inkişaf demək olar ki, aşağı səviyyədədir. Ona görə də İslamiadada rəqabətdən kənarda qalırlar.
- Yenidən Azərbaycana dönmək və burada işləmək kimi planınız varmı?
- Karyeramı bitirdikdən iki il sonra ilk təklifi Səudiyyə Ərəbistanından aldım. İnkişaf etməyi və öz üzərimdə işləməyi sevən insanam. Burada işləmək mənim üçün böyük təcrübə olacaq. Bəlkə, gələcəkdə Azərbaycanda adıma layiq vəzifədə çalışa bilərəm.
- Azərbaycan cüdoçularının İslamiadadakı çıxışını necə dəyərləndirərdiniz?
- Çox gözəl çıxış etdilər. Sevindiricidir ki, Elcan Hacıyev (90 kiloqram) də uzun zədədən sonra tatamiyə qayıtdı. Hidayət Heydərov (73 kiloqram) Olimpiadadan sonra uğursuz nəticələr göstərirdi. Amma bu dəfə qızıl medala sahib çıxdı. İkinci yeri tutan Zelim Kotsoyev (100) də çox gözəl güləşdi. Amma rəqibinin bəxti gətirdi. Gələcəkdə daha yaxşı nəticələrə fokuslanmalıdır.
- Yığmamız finalda Özbəkistan seçməsi ilə qarşılaşacaq. Şansları necə qiymətləndirirsiniz?
- Özbəkistan olduqca çətin rəqibdir. Qadınlarda üstünlük onlardadır. Amma inanıram ki, oğlanlarımız döyüşkənliklə qalib gələcəklər.
- Gələcəkdə Azərbaycanla Səudiyyə Ərəbistanı arasında cüdo üzrə əməkdaşlıq planlaşdırılırmı?
- Artıq işlədiyim komandanı iki dəfə Azərbaycana təlim-məşq toplanışlarına aparmışam. Mentalitetlərimiz də oxşardır. Çalışacağam ki, növbəti illərdə də toplanışları Azərbaycanda keçirək.
