Rüstəm Alimli: "Avropa Kubokunda daha yaxşı çıxış edə bilərdik"

Gənc kişi cüdoçulardan ibarət Azərbaycan millisinin baş məşqçisi Rüstəm Alimli Almaniyanın paytaxtı Berlində keçirilmiş Avropa Kuboku ilə bağlı fikirlərini bölüşüb.

Mütəxəssis bu barədə "Report"a açıqlama verib.

O, sayca üçüncü Avropa Kubokunda iştirak etdiklərini söyləyib:

"Bu yarışlar Avropa və dünya çempionatlarına vəsiqə verir. İdmançılarımız burada reytinq qazanırlar. Bu isə dünya və Avropa çempionatlarında püşkatma zamanı bizə kömək göstərir. Top-8-də olanlar ilkin raundlarda bir-biriləri ilə üz-üzə gəlmirlər. Çalışırıq ki, cüdoçularımızın reytinq xalları daha çox olsun".

R.Alimli 1 qızıl, 4 gümüş və 4 bürünc medal qazanan yığmanın 34 ölkə arasında medalların əyarına görə kişilərin mübarizəsində birinci olmasına münasibət bildirib:

"Bundan daha yaxşı çıxış edə bilərdik. İlk gündə cüdoçularımız üç finalda məğlub oldular. Amma bunu böyük problem saymırıq. Əsas məqsədimiz Avropa və dünya çempionatlarıdır. Həmin yarışlarda tam formada olmalıyıq. Bunu da edəcəyik. Sevindirici hal odur ki, yığmamızda hər çəki dərəcəsində rəqabət çox güclüdür. 3-4 idmançımız əsas turnirlərə vəsiqə qazanmaq üçün güləşirlər. Rəqabət olan yerdə nəticələr də gələcək. Seçim etmək bizim üçün çətindir. Amma haqlı seçim etməyə, ən güclüləri Avropa və dünya çempionatına aparmağa çalışacağıq. Demək olar ki, heyətin yarısını artıq müəyyənləşdirmişik. Yarısı isə rəqabətə davam edəcək. Növbəti Avropa Kuboku iyulun 5-6-da Çexiyanın paytaxtı Praqada keçiriləcək. Əsas heyətdən 5 idmançı bu turnirə yollanacaq".